amit shah

Amit Shah

অমিত শ্বাহ (জন্ম ২২ অক্টোবৰ ১৯৬৪) জ্যেষ্ঠ বিজেপি নেতা আৰু ভাৰতৰ বৰ্তমান গৃহমন্ত্ৰী। তেওঁ ২০১৪ চনৰপৰা ভাৰতীয় জনতা পাৰ্টিৰ অধ্যক্ষ পদত অধিষ্ঠিত হৈ আছে। তেওঁ ২০১৯ চনৰ লোকসভা নিৰ্বাচনৰত তেওঁ গান্ধীনগৰ লোকসভা সমষ্টিৰ পৰা নিৰ্বাচিত হৈছিল। ইয়াৰ আগতে তেওঁ ২০১৭ চনত গুজৰাটৰ পৰা ৰাজ্যসভালৈ নিৰ্বাচিত হৈছিল।

মহাবিদ্যালয়ত পঢ়ি থাকোঁতে তেওঁ ৰাষ্ট্ৰীয় স্বয়ংসেৱক সংঘৰ ছাত্ৰগোট অখিল ভাৰতীয় বিদ্যাৰ্থী পৰিষদৰ লগত জড়িত হৈছিল। ১৮ বছৰ বয়সত তেওঁ অখিল ভাৰতীয় বিদ্যাৰ্থী পৰিষদৰ পদৱী লাভ কৰিছিল। পিছলৈ ১৯৮৭ চনত তেওঁক বিজেপিলৈ পঠিওৱা হৈছিল।

শ্বাহে প্ৰথমে চাৰকেজ বিধানসভা সমষ্টিৰ পৰা ১৯৯৭ চনত গুজৰাট বিধানসভালৈ নিৰ্বাচিত হৈছিল। ২০০৭ চনলৈ তেওঁ এই আসনৰ পৰা গুজৰাট বিধানসভালৈ প্ৰতিনিধিত্ব আগবঢ়াইছিল। তাৰপিছত তেওঁ নাৰণপুৰা বিধানসভা সমষ্টিৰ পৰা ২০১৭ চনলৈ বিধানসভাত প্ৰতিনিধিত্ব কৰে। নৰেন্দ্ৰ মোদী গুজৰাটৰ মুখ্যমন্ত্ৰী হৈ থাকোঁতে অমিত শ্বাহে বহুতো গুৰুত্বপূৰ্ণ পদবীত অধিষ্ঠিত আছিল।

২০১৪ চনৰ লোকসভা নিৰ্বাচনত অমিত শ্বাহক উত্তৰ প্ৰদেশৰ পৰ্যবেক্ষকৰ দায়িত্ব দিয়া হৈছিল আৰু তেওঁৰ মাৰ্গ-দৰ্শনত বিজেপিয়ে উত্তৰ প্ৰদেশত ৮০খন আসনৰ ভিতৰত ৭৩খন আসন জয় লাভ কৰিছিল। ইয়াৰ লগে লগে ৰাষ্ট্ৰীয় প্ৰেক্ষাপটত তেওঁৰ গুৰুত্ব বাঢ়িবলৈ লয়। ইয়াৰ পিছতে ২০১৪ চনৰ জুলাই মাহত তেওঁ ভাৰতীয় জনতা পাৰ্টিৰ অধ্যক্ষ হিচাপে নিযুক্তি লাভ কৰে।

তেওঁ বিজেপিত সুসংগঠিত আৰু সদস্য ভুক্তিৰ বাবে বিশেষকৈ জনাজাত। তেওঁৰ কাৰ্যকালৰ আৰম্ভণিতে ২০১৪ চনত বিজেপিয়ে মহাৰাষ্ট্ৰ, হাৰিয়ানা, জম্মু আৰু কাশ্মীৰ, ঝাৰখণ্ড আৰু ২০১৫ চনত অসম বিধানসভা নিৰ্বাচনত বিজয়ী হৈছিল। ইয়াৰ লগতে দিল্লী আৰু বিহাৰত পৰাস্ত হৈছিল।

তেওঁৰ নেতৃত্বত ২০১৭ চনৰ উত্তৰ প্ৰদেশ, উত্তৰাখণ্ড আৰু গুজৰাট বিধানসভা নিৰ্বাচনত বিজেপিয়ে জয় লাভ কৰে। একেবছৰতে বিজেপিয়ে মণিপুৰ বিধানসভাত প্ৰথমবাৰৰ বাবে জয়ী হয় কিন্তু পঞ্জাৱত বিজেপিৰ মিত্ৰজোঁট অকালি দলে পৰাজয় বৰণ কৰে। ২০১৮ চনত বিজেপিয়ে ছত্তীশগঢ়, ৰাজস্থান আৰু মধ্য প্ৰদেশ নিৰ্বাচনত পৰাজিত হয়। তাৰপিছত বিজেপিয়ে ২০১৯ চনৰ লোকসভা নিৰ্বাচনত ৩০৩খন আসন লাভ কৰি নিৰঙ্কুশ সংখ্যাগৰিষ্ঠতা লাভ কৰে। ইয়াৰ ফলত অমিত শ্বাহ ভাৰতীয় জনতা পাৰ্টিৰ আটাইতকৈ সফল অধ্যক্ষত পৰিগণিত হয়।

১৯৬৪ চনৰ ২২ অক্টোবৰ তাৰিখে মুম্বাইৰ এক সম্ভ্ৰান্ত গুজৰাটী বনিয়া পৰিয়ালত অমিত শ্বাহৰ জন্ম হৈছিল। তেওঁৰ আজুককা মনসা ষ্টেটৰ নগৰশেঠ আছিল। তেওঁৰ পিতৃ অনিল চন্দ্ৰ শ্বাহ গুজৰাটৰ মনসাৰ এগৰাকী পিভিচি প্লাষ্টিক পাইপ ব্যৱসায়ী। তেওঁ প্ৰাৰম্ভিক শিক্ষা মেহসনাত গ্ৰহণ কৰাৰ পিছত আহমেদাবাদলৈ উচ্চ শিক্ষাৰ বাবে যায়। তাত তেওঁ চি.ইউ. শ্বাহ বিজ্ঞান মহাবিদ্যালয়ত তেওঁ জৈৱৰসায়ন অধ্যয়ন কৰিছিল। বিজ্ঞান বিভাগৰ স্নাতক ডিগ্ৰী অৰ্জন কৰাৰ পিছত তেওঁ দেউতাকৰ ব্যৱসায়ত যোগ দিয়ে। ইয়াৰ লগতে তেওঁ আহমেদাবাদৰ সমবায় বেংক সমূহত ষ্টকব্ৰকাৰ হিচাপেও কাম কৰিছিল।

তেওঁ সৰুৰে পৰা ৰাষ্ট্ৰীয় স্বয়ংসেৱক সংঘৰ লগত জড়িত আছিল। তেওঁ ১৯৮২ চনত আহমেদাবাদ আৰ.এছ.এছ. কেন্দ্ৰত পোন প্ৰথমবাৰৰ বাবে নৰেন্দ্ৰ মোদীক লগ পাইছিল। সেই সময়ত নৰেন্দ্ৰ মোদী আৰ.এছ.এছ.ৰ প্ৰচাৰক আছিল।

(উৎসঃৱিকিপেডিয়া)

Amit Shah - All Results

 

এতিয়া LIVE

    শেহতীয়া বাতৰি