Taliban Salima Mazari: যুৱতী–মহিলাক যৌনদাসী বনোৱা তালিবানৰ বিৰুদ্ধে যমদূত হৈ থিয় দিছে এইগৰাকী মহিলা! চমকিত সমগ্ৰ বিশ্ব

সমগ্ৰ আফগানিস্তানত তাণ্ডৱ চলাইছে তালিবানে। সন্ত্ৰাসবাদীসকলে আফগানিস্তানৰ ৰাজধানী কাবুলো দখল কৰাৰ পথত। এখনৰ পিছত আনখন চহৰ–গাঁও দখল কৰিছে তালিবানে। লগতে নিৰীহ মানুহক হত্যাসহ মহিলাসকলক ঘৰৰ পৰা উঠাই নি যৌনদাসী বনাইছে সন্ত্ৰাসবাদীয়ে। আৰু ইয়াৰ মাজতে তালিবানৰ যমদূত হৈ দেখা দিছে এগৰাকী মহিলা ৰাজ্যপাল। হাতত বন্দুক তুলি লৈছে এইগৰাকী সাহসী মহিলাই।

আফগানিস্তানত হত্যালীলা চলোৱা তালিবান সন্ত্ৰাসবাদীসকলক এশিকনী দিবলৈ ছালিমা মাজাৰিয়ে নিজৰ সেনানী গঢ়ি তুলিছে। আফগানিস্তানৰ নিৰীহ মানুহে নিজৰ পোহনীয় পশু আৰু মাটি বিক্ৰী কৰি মাৰণাস্ত্ৰ কিনি ছালিমাৰ সেনাত যোগদান কৰিছে।

আফগানিস্তানৰ চাৰকিন্ত জিলাৰ মহিলা ৰাজ্যপাল ছালিমা মাজাৰী। যি তালিবানীয়ে সমগ্ৰ আফগানিস্তান কাৰ্যতঃ হাতৰ মুঠিত নিয়াৰ চেষ্টা চলাইছে, সেই তালিবান এতিয়া ভয়ত কঁপিছে ছালিমাৰ বাবে। প্ৰতিদিনে ছালিমাই নিজৰ সেনাক আৰু অধিক শক্তিশালী কৰি তুলিছে।

পুৰুষ প্ৰধান আফগানিস্তানৰ এগৰাকী মহিলা ৰাজ্যপালে তালিবানৰ সৈতে যুঁজ কৰাৰ বাবে পুৰুষসকলক লৈ সেনা গঠন কৰিছে। আফগানিস্তানৰ গাঁও–ভূঞে সোমাই পৰিছে ছালিমা। যেন তালিবানৰ হাতৰ পৰা দেশক ৰক্ষা কৰাৰ সংকল্প লৈছে ছালিমাই।

সাধাৰণ মানুহক তালিবানৰ বিৰুদ্ধে একত্ৰ কৰিছে ছালিমাই। ছালিমাৰ নিজৰ আহ্বানক সঁহাৰি জনাই তেওঁক ৰাজ্যপাল পদত নিযুক্ত কৰিছিল আফগান চৰকাৰে। ইয়াৰ পিছত ছালিমাই তালিবান সন্ত্ৰাসবাদীৰ কথা মনত ৰাখি নিৰাপত্তা কমিচন স্থাপন কৰে। আৰু আজি যেতিয়া পুনৰ আফগানিস্তান দখল কৰিছে তালিবানে, এই সময়তে বীৰদৰ্পে নামি পৰিছে ছালিমা।