২০০০ ফুট ওখ পাহাৰত নিৰ্মাণ হ’ব হোটেল, শূন্যত ওলমি থাকিব ছুইমিং পুল

নৰৱে’ত ২০০০ ফুট ওখ পাহাৰ প্ৰিকেষ্টলেনত এখন হোটেলৰ ডিজাইন কৰা হৈছে। দক্ষিণ নৰৱে’স্থিত এই পাহাৰখনলৈ আহে বহু পৰ্যটক। পৰ্যটকৰ সংখ্যা বৃদ্ধি পোৱালৈ লক্ষ্য ৰাখি এই হোটেলখন শীঘ্ৰে নিৰ্মাণ কৰা হ’ব।

এই হোটেলখন পাহাৰ কাটি ডিজাইন কৰা হ’ব। হোটেলখনৰ বিশেষ আকৰ্ষণ হ’ব ইয়াৰ ছুইমিং পুল। এই ছুইমিং পুল গ্লাছেৰে নিৰ্মাণ কৰা হ’ব আৰু শূন্যত ওলমি থাকিব। হোটেলখনৰ ডিজাইন কৰিছে তুৰ্কীৰ এটা আৰ্কিটেকচাৰেল ষ্টুডিঅ’ই।

পাহাৰ কাটি নিৰ্মাণ কৰিবলগীয়া হোটেলখনত থাকিব ৫টা মহলা। ওপৰ মহলাৰ পৰা পাহাৰৰ তলৰ সমগ্ৰ দৃশ্য চাব পাৰিব। একেবাৰে তলৰ মহলাত পৰ্যটকৰ বিশ্ৰামৰ বাবে ডেক আৰু ছুইমিং পুল নিৰ্মাণ কৰা হ’ব।

ইস্তানবুলৰ হয়াৰী অতাক ষ্টুডিঅ’ই এই হোটেলখনৰ ডিজাইন কৰিছে। এতিয়ালৈ এই হোটেলখন নিৰ্মাণৰ বাবে নৰৱে’ চৰকাৰৰ অনুমতি লাভ কৰা নাই। ডিজাইন প্ৰস্তুত কৰা ষ্টুডিঅ’ই দাবী কৰিছে যে এতিয়ালৈ এনে ধৰণৰ হোটেল আৰু ছুইমিং পুল বিশ্বৰ কোনো ঠাইত ডিজাইন কৰা হোৱা নাই।

ইয়াৰ পূৰ্বে লণ্ডনত ৫৫ মহলাত এটা ছুইমিং পুল ডিজাইন কৰা দেখা গৈছিল। ইয়াৰ নাম দিয়া হৈছিল ইনফিনিটী লণ্ডন। ডিজাইনাৰ কোম্পানীয়ে দাবী কৰিছিল যে এই ছুইমিং পুলৰ পৰা লণ্ডনৰ ৩৬০ ডিগ্ৰী দৃশ্য দেখা যাব।