বিত্তীয় মন্দাৱস্থা শীৰ্ষত উপনীত হৈছে। গতিকে ইমৰান খানৰ চৰকাৰে প্ৰধানমন্ত্ৰীৰ বাসগৃহ ভাড়াত দিবলৈ বাধ্য হৈছিল। এতিয়া পাক সংবাদ মাধ্যমসমূহেও চৰকাৰক ব্যাপকভাৱে সমালোচনা কৰিছে ইয়াৰ বাবে। পাক চৰকাৰে ২০১৮ চনত ঘোষণা কৰিছিল যে প্ৰধানমন্ত্ৰীৰ বাসগৃহত এক শিক্ষা প্ৰতিষ্ঠান প্ৰতিষ্ঠা কৰা হ'ব। ইয়াৰ পিছত ২০১৯ চনত পাক প্ৰধানমন্ত্ৰীৰ বাসগৃহ বিবাহগৃহ হিচাপে ভাড়া দিয়া হৈছিল। ইয়াকে লৈ বহুত হুলস্থূল হৈছিল দেশখনত। পাকিস্তানৰ শিক্ষামন্ত্ৰী শ্বাফকত মাহমুদে কৈছিল যে প্ৰধানমন্ত্ৰীৰ বাসগৃহৰ বাৰ্ষিক তত্ত্বাৱধানত ব্যয় হৈছে ৪৭ লাখ টকা। গতিকে সেই বাসগৃহটো শিক্ষা প্ৰতিষ্ঠান হিচাপে ভাড়াত দিয়াৰ সিদ্ধান্ত লোৱা হৈছিল। ইমৰান খানৰ চৰকাৰ পাকিস্তানৰ আন্তঃগাঁথনি উন্নয়নৰ বাবে চীনৰ ওপৰত নিৰ্ভৰশীল। তাতে আকৌ কোৰোনা তথা লকডাউনে পাক অৰ্থনীতিত যথেষ্ট প্ৰভাৱ পেলাইছে, যাৰ বাবে পাক চৰকাৰ প্ৰায় দেউলিয়া হৈ গৈছে। চৰকাৰে কেৱল ইমৰান খানৰ বাসভৱনে নহয় পাকিস্তানৰ ৰাজ্যপালসকলৰ বাসগৃহও ভাড়াত দিয়াৰ সিদ্ধান্ত লৈছে। ৰাজ্যপালসকলৰ বাসগৃহ ইতিমধ্যে খালী কৰা হৈছে বুলি জানিব পৰা গৈছে।
