Ahmad Massoud Afghanistan: ‘সিংহ পুত্ৰ’! লণ্ডনত পঢ়া–শুনা কৰি থাকে দুৰ্গম পাহাৰত, যাৰ কথা শুনিলে ভয় খায় তালিবানেও!

আত্মসমৰ্পণ নহয়, বৰং তালিবানৰ বিৰুদ্ধে যুদ্ধ ঘোষণা কৰিছে বিৰোধী নেতা আহমেদ মাছুদে। আচলতে আফগানিস্তানৰ দুৰ্গম পঞ্জশীৰ বিদেশী শত্ৰুৰ বাবে এক অভেদ্য দুৰ্গ। সেই পঞ্জশীৰৰে ‘সিংহ পুত্ৰ’ বুলি পৰিচিত মাছুদ। ‘পঞ্জশীৰৰ সিংহ’ হিচাপে পৰিচিত প্ৰয়াত আহমেদ শ্বাহ মাছুদৰ পুত্ৰ আহমেদ মাছুদে এতিয়া তালিবানৰ বিৰুদ্ধে প্ৰতিৰোধ গঢ়ি তুলিছে।

এতিয়াও পঞ্জশীৰ উপত্যকা দখল কৰিব পৰা নাই তালিবানে। এইাৰ সেই উপত্যকা দখল কৰিবলৈ শ শ যোদ্ধা প্ৰেৰণ কৰিছিল তালিবানে। কিন্তু সমগ্ৰ দেশৰ পতন হৈছে তালিবানৰ হাতত। কিন্তু ব্যতিক্ৰম যেন পঞ্জশীৰ।

লণ্ডনৰ কিংছ কলেজৰ প্ৰাক্তন ছাত্ৰ আহমেদ মাছুদৰ নেতৃত্বত গঢ়ি উঠা নেচনেল ৰেজিষ্টেন্স ফ্ৰণ্ট অব আফগানিস্তানে তালিবানৰ বিৰুদ্ধে অভেদ্য দুৰ্গ গঢ়ি তুলিছে। আফগান সেনাৰ এটা অংশয়ো মাছুদ বাহিনীৰ সৈতে হাত মিলাইছে।

কাবুলৰ পৰা ১০০ কিলোমিটাৰ দূৰৰ হিন্দুকুশ পাহাৰৰ কোলাত থাকে এই ‘সিংহ পুত্ৰ’। দুৰ্গম এক উপত্যকা পঞ্জশীৰ। ছোভিয়েট আগ্ৰানৰ পৰা আৰম্ভ কৰি তালিবানৰ দৌৰাত্ম্য, পঞ্জশীৰক কেতিয়াও পৰাভূত কৰিব পৰা নাই। সেই দুৰ্গম উপত্যকাত তালিবানবিৰোধী বাহিনী লৈ যুদ্ধংদেহী ভংগী গ্ৰহণ কৰিছে মাছুদে।

আহমেদ মাছুদৰ সৈতে হাত মিলাইছে আফগানিস্তানৰ ফাৰ্ষ্ট ভাইচ প্ৰেচিডেণ্ট তথা নিজকে আফগানিস্তানৰ কেয়াৰটেকাৰ প্ৰেছিডেণ্ট ঘোষণা কৰা আমৰুল্লা ছালেহে।

‘পঞ্জশীৰৰ সিংহ’ আহমেদ শ্বাহ মাছুদৰ একমাত্ৰ পুত্ৰ এই আহমেদ মাছুদে আন্তঃৰাষ্ট্ৰীয় দৃষ্টিভংগীৰ সৈতে তাল মিলাই এনে এখন চৰকাৰৰ উল্লেখ কৰিছে. সেই চৰকাৰৰ নেতৃত্বত ন্যায় বিচাৰ, সমতা, ঐক্য, ইছলামৰ লগতে সকলোৰে গ্ৰহণযোগ্যতাৰ নীতি থাকে। আনকি তালিবানে তেওঁলোকৰ চৰমপন্থা এৰিলে চৰকাৰত চামিল কৰিবলৈও সমস্যা নাই মাছুদৰ।