ভেকচিন প্ৰয়োগৰ পূ্ৰ্বে কোৰোণাত প্ৰাণ হেৰুৱাব পাৰে ২০ লাখ লোকে! WHOৰ সতৰ্কবাণী

বিশ্বজুৰি কোৰোণা প্ৰতিৰোধ কৰিবলৈ কোনো ভেকচিন ব্যৱহাৰৰ পূৰ্বেই কোৰোণাই প্ৰাণ কাঢ়ি নিব পাৰে বিশ্বৰ প্ৰায় ২০ লাখ লোকৰ।  শুকুৰবাৰে এই আশংকা প্ৰকাশ কৰিছে বিশ্ব স্বাস্থ্য সংস্থাই।

বিশ্ব স্বাস্থ্য সংস্থাৰ এগৰাকী বিষয়াই দাবী কৰে যে, এতিয়া কোৰোণাত আক্ৰান্ত হৈ মৃত্যু হোৱা লোকৰ সংখ্যা বাঢ়িছে। যদি এনেদৰেই কোৰোণাৰ সংহাৰী ৰূপ অব্যাহত থাকে, তেন্তে ২০ লাখ লোকে প্ৰাণ হেৰুৱাব পাৰে কোৰোণাত।

প্ৰায় ৯ মাহ পূৰ্বে কোৰোণাত আক্ৰান্ত প্ৰথমজন ৰোগী ধৰা পৰিছিল চীনত। তাৰ পিছতে সমগ্ৰ বিশ্বত সংহাৰী ৰূপ ধাৰণ কৰে কোৰোণাই।  এই পৰ্যন্ত কোৰোণাত আক্ৰান্ত হৈ ১০ লাখ লোকে প্ৰাণ হেৰুৱাইছে।

ইতিমধ্যে কোৰোণাক প্ৰতিৰোধৰ বাবে বহু কেইটা ভেকচিন প্ৰস্তুতৰ কাম চলি আছে। কঠোৰ পৰিশ্ৰম কৰিছে সমগ্ৰ বিশ্বৰে চিকিত্‍সা বিজ্ঞানী সকলে।

শুকুৰবাৰে চীনৰ স্বাস্থ্য বিভাগৰ এজন অধিকাৰীয়ে দাবী কৰে যে, ক্লিনিকেল ট্ৰায়েলৰ মাজতে সাধাৰণ মানুহৰ ওপৰত ভেকচিনৰ পৰীক্ষামূলক ব্যৱহাৰৰ বাবে লোৱা সিদ্ধান্তক সমৰ্থন জনাইছে বিশ্ব স্বাস্থ্য সংস্থাই।