China Sponge City: এয়াও সম্ভৱ নেকি! বিশ্বই ভাবিব নোৱাৰা এক আজৱ চহৰ নিৰ্মাণ কৰিব চীনে

চীনৰ লেশান চহৰৰ কাষেৰে বৈ গৈছে ইয়াংছি নদীৰ তিনিটা শাখা। কেইবা শতাব্দী পূৰ্বে লেশান চহৰৰ বাসিন্দাসকলে পাহাৰ খনন কৰি বুদ্ধৰ এটা শিলৰ মূৰ্তি তৈয়াৰ কৰিছিল।

৭০ মিটাৰ উচ্চতাৰ এই প্ৰাচীন বুদ্ধমূৰ্টিটো নদীৰ কাষত থাকিলেও ইমান দিনে কোনো সমস্যা হোৱা নাছিল। কিন্তু ২০২০ চনৰ আগষ্ট মাহত বিশাল আকৃতিৰ বুদ্ধমূৰ্তিটোৰ ভৰি পানীত ডুব যায়। বিগত বৰ্ষত লেশান চহৰ ভয়ংকৰ বানৰ কবলত পৰিছিল। বানত লেশানৰ বাসিন্দাসকল ব্যাপকভাৱে ক্ষতিগ্ৰস্ত হয়।

লেশানত এই পৰিস্থিতিৰ বাবে কেৱল নদীয়ে দায়ী নহয়, নগৰ পৰিকল্পনাবিদসকলে এই চহৰৰ পৰা বানপানী বাহিৰ কৰাৰ উপযুক্ত ব্যৱস্থা গ্ৰহণ কৰাত ব্যৰ্থ হৈছে। চীনৰ আন নানা চহৰো একেই সমস্যাৰ সন্মুখীন হৈছে। অতিবৃষ্টিৰ ফলত সৃষ্টি হোৱা বান পৰিস্থিতিত বিপৰ্যস্ত তেওঁলোক।

সেয়ে চীনত বান সমস্যা দূৰ কৰিবলৈ ‘স্পঞ্জ চিটী’ গঢ়ি তোলাৰ প্ৰক্ৰিয়া আৰম্ভ হৈছে। স্পঞ্জ চিটী হ’ল এনে এক ব্যৱস্থা, য’ত চহৰসমূহে বৰষুণৰ পানী শুহি লৈ বান সমস্যা প্ৰতিৰোধ কৰিব। চীনৰ পুৰণি কৃষি ব্যৱস্থাৰ পৰাই এই কৌশল উদ্ভাৱন কৰিছে বিজ্ঞানীসকলে।

২০৩০ চনৰ ভিতৰত ৮০ শতাংশ চহৰৰ ৭০ শতাংশ বৰষুণৰ পানী সংৰক্ষণ কৰি সেয়া পুনৰ ব্যৱহাৰৰ উপযোগী কৰিব। ‘স্পঞ্জ ইফেক্ট’ তৈয়াৰৰ বাবে কৃত্ৰিম জলভূমি তৈয়াৰসহ আন প্ৰয়োজনীয় ব্যৱস্থা গ্ৰহণ কৰিছে চীনে। কিন্তু এই প্ৰকল্প বৰ্তমান যি পৰ্যায়ত আছে, এই অৱস্থাত এতিয়াও ইয়াৰ কাৰ্যকাৰিতাৰ বিষয়ে স্পষ্ট নহয়।