বায়ু প্ৰদূষণে প্ৰতিবছৰে ৭০ লাখ লোকৰ মৃত্যু ঘটায়, বিশ্ব স্বাস্থ্য সংস্থাৰ নতুন নিৰ্দেশনা

বিশ্ব স্বাস্থ্য সংস্থাই এতিয়া বায়ু প্ৰদূষণ (Air Polution)ক ধূমপান বা অস্বাস্থ্যকৰ আহাৰৰ সমতুল্য বুলি বিবেচনা কৰিছে। ইয়াৰ ফলস্বৰূপে বিশ্ব স্বাস্থ্য সংস্থাই নতুন কঠোৰ নিৰ্দেশনা জাৰি কৰিছে। সংগঠনটোৱে দাবী কৰিছে যে ই লাখ লাখ লোকৰ জীৱন ৰক্ষা কৰিব পাৰে।

২২ ছেপ্টেম্বৰত বিশ্ব স্বাস্থ্য সংস্থাই কয় যে বায়ু প্ৰদূষণ এতিয়া মানৱ জীৱনৰ বাবে আটাইতকৈ ডাঙৰ পাৰিপাৰ্শ্বিক ভাবুকি, যাৰ ফলত প্ৰতিবছৰে ৭০ লাখ লোকৰ অকাল মৃত্যু হয়।

এইক্ষেত্ৰত বিশ্ব স্বাস্থ্য সংস্থাই প্ৰকাশ কৰিছে নতুন মান নিৰ্ণয়ৰ নিৰ্দেশনা। সংস্থাটোৰ মতে, এই নিৰ্দেশনাৱলীয়ে 'লাখ লাখ লোকৰ জীৱন ৰক্ষা কৰিব পাৰে'। নতুন নিৰ্দেশনাবোৰ অ'জন, নাইট্ৰজেন ডাই অক্সাইড, ছালফাৰ ডাই অক্সাইড আৰু কাৰ্বন মনোক্সাইডকে ধৰি পদাৰ্থবোৰৰ ক্ষেত্ৰত প্ৰযোজ্য।

বিশ্ব স্বাস্থ্য সংস্থাই প্ৰতি দেশৰ চৰকাৰক এই নিৰ্দেশনা অনুসৰণ কৰিবলৈ আবেদন কৰে। কিয়নো বায়ু প্ৰদূষণ ভবাতকৈ অধিক বিপজ্জনক। বিশ্ব স্বাস্থ্য সংস্থাই শেষবাৰৰ বাবে ২০০৫ চনত বায়ুৰ গুণগত মানৰ নিৰ্দেশনা জাৰি কৰিছিল, যি সমগ্ৰ বিশ্বৰ পৰিৱেশ নীতিৰ ওপৰত গুৰুত্বপূৰ্ণ প্ৰভাৱ পেলাইছিল।

অৱশ্যে, সংগঠনটোৱে কয় যে যোৱা ১৬ বছৰ ধৰি এনে প্ৰমাণ পোৱা গৈছে যে বায়ু প্ৰদূষণে মানৱ স্বাস্থ্যক প্ৰভাৱিত কৰে। এতিয়া দেখা গৈছে বায়ু প্ৰদূষণে মানৱ স্বাস্থ্যৰ ওপৰত আগৰ তুলনাত বহুত বেছি প্ৰভাৱ পেলাইছে।