Stadium 974: কাটাৰত বিশ্বকাপ ফুটবল অনুষ্ঠিত হোৱা এখন আচৰিত ষ্টেডিয়াম, খেল শেষ হোৱাৰ লগে লগে ষ্টেডিয়ামো শেষ!

ফিফা বিশ্বকাপৰ জ্বৰত আক্ৰান্ত সমগ্ৰ বিশ্ব। এইবাৰৰ বিশ্বকাপত একাধিক নতুন নতুন বিষয়ে চৰ্চা লাভ কৰিছে। তাৰ ভিতৰত এটা হ’ল দোহাত নিৰ্মাণ হোৱা ষ্টেডিয়াম নম্বৰ ৯৭৪। এই ষ্টেডিয়ামখন কণ্টেইনাৰেৰে নিৰ্মাণ কৰা হৈছে। খেল শেষ হ’ল, গতিকে এতিয়া ভাঙি পেলোৱা হ’ব ষ্টেডিয়ামখন। ব্ৰাজিল বনাম দক্ষিণ কোৰিয়াৰ মেচখন এই ষ্টেডিয়ামখনৰ অন্তিম মেচ আছিল। যিখন মেচত ৪–১ গলত ব্ৰাজিল জয়ী হৈছিল। সেই ষ্টেডিয়ামখন আৰু তাত নাথাকিব। কণ্টেইনাৰবোৰ ভাঙি আকৌ আন দেশলৈ নিয়া হ’ব। নতুন স্থানত নিৰ্মাণ কৰা হ’ব ষ্টেডিয়াম। কণ্টেইনাৰ খুলি নিয়াৰ পিছত ষ্টীলৰ কনষ্ট্ৰাকচনো একেদৰেই খুলি নিয়া হ’ব।

৪০ হাজাৰ দৰ্শক বহিব পৰা এই ষ্টেডিয়ামখনৰ ভৱিষ্যৎ ইতিমধ্যে স্থিৰ হৈছে। লণ্ডনৰ চেথাম হাউছ থিংকটেংকৰ এজন কৰিম এলগেণ্ডি আছিল কাটাৰ বিশ্বকাপৰ ক্লাইমেট কনছালটেণ্ট। তেওঁ কয় দীৰ্ঘম্যাদী ক্ষেত্ৰত এই ধৰণৰ পুনৰ নিৰ্মাণ এক ডাঙৰ অধ্যায়।

দুসপ্তাহৰ কম সময়ৰ বাবে আত্মপ্ৰকাশ কৰা বিশ্বকাপৰ এই স্থান ষ্টেডিয়াম ৯৭৪ৰ এইবাৰৰ বাবে জীৱনকাল শেষ। ৯৭৪ টা ষ্টেকড শ্বিপিং কণ্টেইনাৰেৰে তৈয়াৰ কৰা এই ষ্টেডিয়ামত ৭খন মেচ খেলা হৈছে। বিশ্বকাপৰ ইতিহাসত এয়া প্ৰথম অস্থায়ী ষ্টেডিয়াম।

আশা কৰা হৈছে, এয়া ষ্টেডিয়ামখন বৰ্তমান আফ্ৰিকালৈ যাব। তাৰ পিছত হয়তো উৰুগুৱেলৈ যাব। উৰুগুৱেত পেন ছাউথ আমেৰিকা প্ৰতিযোগিতা হ’ব ২০৩০ত।