অৱশেষত মেছিয়ে স্পৰ্শ কৰিলে মাৰাডোনাক ! বিশ্বকাপৰ মজিয়াত খেলেই নহয় গ'লেৰেও স্পৰ্শ কৰিলে মেছিয়ে ...

কাটাৰত অনুষ্ঠিত বিশ্বকাপত লিঅ'নেল মেছিৰ আৰ্জেণ্টিনাই মেক্সিকোৰ বিৰুদ্ধে ২-০ গ'লত জয়লাভ কৰে। খেলখনত আৰ্জেণ্টিনাৰ অধিনায়কে নিজেই এটা সুন্দৰ গ'ল কৰিছিল।

মেক্সিকোৰ বিৰুদ্ধে জয়ে কেৱল আৰ্জেণ্টিনাক অক্সিজেন প্ৰদান কৰাই নহয়, লিয়োনেল মেছিয়ে আৰ্জেণ্টিনা ফুটবলৰ ইতিহাসতো এক নতুন অভিলেখ গঢ়িছে। মেছিয়ে বিশ্বকাপত সৰ্বাধিক মেচ খেলাৰ ক্ষেত্ৰত মাৰাডোনাক স্পৰ্শ কৰিছে। একে সময়তে, লিঅ'ই মাৰাডোনাৰ সমান গ'ল কৰাৰ অভিলেখো গঢ়িছে।

মাৰাডোনাই বিশ্বকাপত আৰ্জেণ্টিনাৰ হৈ খেলা সৰ্বাধিক খেলৰ অভিলেখ গঢ়িছিল। ৮৬ তম বিশ্ব বিজয়ৰ নায়কজনে নীলা-বগা জাৰ্চীত ২১ খন মেচ খেলিছে। প্ৰয়াত কিংবদন্তীগৰাকীয়ে মুঠ চাৰিখন বিশ্বকাপত ২১ খন খেলত ৮ টা গ'ল কৰিছে।

মেক্সিকোৰ বিৰুদ্ধে খেলি থাকোতে মেছিয়ে বিশ্বকাপত আৰ্জেণ্টিনাৰ হৈ ২১ খন মেচ খেলাৰ অভিলেখৰ সৈতে মাৰাডোনাৰ সমকক্ষ হয়। ইয়াৰ পূৰ্বে, বিশ্বকাপত মেছিৰ ৭ টা গ'ল আছিল। মেক্সিকোৰ বিৰুদ্ধে মেছিৰ গ'লৰ সংখ্যাও ৮লৈ বৃদ্ধি হয়।

মাৰাডোনাই ১৯৮২ চনৰ বিশ্বকাপত ৫ খন খেলত ২টা, ১৯৮৬ চনৰ বিশ্বকাপত ৭ খন খেলত ৫টা, ১৯৯০ চনৰ বিশ্বকাপত ৭ খন খেলত ০ টা আৰু ১৯৯৪ চনৰ বিশ্বকাপত ২ খন খেলত ১ টা গ'ল কৰিছিল। আনহাতে, মেছিয়ে ২০০৬ চনৰ বিশ্বকাপত ৩ খন খেলত ১টা, ২০১০ চনৰ বিশ্বকাপত ৫ খন খেলত ০টা, ২০১৪ চনৰ বিশ্বকাপত ৭ খন খেলত ৪ টা গ'ল, ২০১৮ বিশ্বকাপত ৪ খন খেলত ১ টা গ'ল, ২০২২ চনৰ বিশ্বকাপত এতিয়ালৈকে ২ খন মেচত ২ টা গ'ল কৰিছে।