Aainball Championship: সৰ্বভাৰতীয় প্ৰেক্ষাপটত জিলিকিল অসম, ৰাষ্ট্ৰীয় আইনবল খেলত চেম্পিয়নৰ খিতাপ

সৰ্বভাৰতীয় প্ৰেক্ষাপটত জিলিকিল অসম আইনবল দল। ৰাষ্ট্ৰীয় আইনবল চেম্পিয়নশ্বিপত মধ্যপ্ৰদেশক হৰুৱাই অসম আইনবল দলটোৱে চেম্পিয়নৰ খিতাপ দখল কৰিবলৈ সক্ষম হয়।

এইবাৰৰ তৃতীয় আইনবল ৰাষ্ট্ৰীয় চেম্পিয়নশ্বিপ (National Aainball Championship 2021) খেলখন অনুষ্ঠিত হৈছিল গুজৰাটত। ছেমিফাইনেলত বিহাৰক হৰুৱাই অসম দলটো ফাইনেলত উপনীত হৈছিল আৰু ফাইনেলত প্ৰতিদ্বন্দ্বী মধ্যপ্ৰদেশৰ (Madhya Pradesh) দলটোক ৭৫ পইণ্টত হৰুৱাই চেম্পিয়নৰ খিতাপ দখল কৰে।

অসম দলটোত (Assam Aainball Team) খেলুৱৈ ৰূপে আছিল প্ৰজ্ঞান শৰ্মা (অধিনায়ক), কমলেশ্বৰ বসুমতাৰী, বিজয় ডেকা, অমিত গয়াৰী, অৰুণ বসুমতাৰী, ইজাজুল হক, নাৰায়ণ বসুমতাৰী, সুজিত বসুমতাৰী, প্ৰদীপ সৰকাৰ, মিথিছৰ বসুমতাৰী, জেহেৰুল ইছলাম, প্ৰিয়ম বৰ্মন। দলটোৰ প্ৰধান প্ৰশিক্ষক ৰূপে আছিল দীপাংকৰ কলিতা।

উল্লেখ্য যে আইনবল খেল ভাৰতত প্ৰথমবাৰৰ বাবে ২০১৩ চনৰ পৰা আৰম্ভ হয়। ভাৰতৰ নেচনেল আইনবল ফেডাৰেচন গঠন হোৱাৰ পিছত এতিয়ালৈ তিনিখন নেচনেল গেমছ অনুষ্ঠিত হৈছে। সম্পূৰ্ণৰূপে নতুন খেল আইনবল। এই খেলত পুৰুষ মহিলা উভয়ে অংশগ্ৰহণ কৰিব পাৰে।

উত্তৰ আফ্ৰিকাৰ মৰক্কোত ২০০৬ বৰ্ষত ক্ৰীড়া বিজ্ঞানী মহম্মদ হামানে জন্ম দিছিল এই খেল। এই খেলতে সৰ্বভাৰতীয় প্ৰেক্ষাপটত অসম আইনবল সংস্থাৰ পৰা প্ৰেৰিত অসম আইনবল দলটো চেম্পিয়ন ( national champion) হৈ অসমবাসীকে গৌৰৱান্বিত কৰিলে।