১ লাখ টকীয়া ৰিভলভাৰ, ৮০ হাজাৰৰ পিষ্টল! যোগী আদিত্যনাথৰ সম্পত্তিৰ তালিকাত আৰু কি কি?

প্ৰথমবাৰলৈ বিধানসভা নিৰ্বাচনত প্ৰতিদ্বন্দ্বিতা কৰিব উত্তৰ প্ৰদেশৰ মুখ্যমন্ত্ৰী যোগী আদিত্যনাথে। আজি গোৰখপুৰ চহৰ কেন্দ্ৰত মনোনয়ন পত্ৰ জমা দিলে যোগী আদিত্যনাথে। মনোনয়ন পত্ৰৰ সৈতে দিয়া শপতনামাত নিজৰ সম্পত্তি সংক্ৰান্তীয় তথ্য জমা দিছে উত্তৰ প্ৰদেশৰ মুখ্যমন্ত্ৰীগৰাকীয়ে।

যোগী আদিত্যনাথে দাখিল কৰা শপতনামা অনুসৰি, তেওঁৰ মুঠ সম্পত্তিৰ পৰিমাণ ১ কোটি ৫৪ লাখ ৯৪ হাজাৰ ৫৪ টকা। ইয়াৰ ভিতৰত আছে তেওঁৰ হাতত থকা নগদ ধন আৰু বেংকৰ জমা।

নিৰ্বাচন আয়োগক দিয়া তথ্য অনুসৰি, যোগী আদিত্যনাথে ১২ হাজাৰ টকীয়া ম’বাইল ফোন ব্যৱহাৰ কৰে। ইয়াৰ উপৰি তেওঁৰ ওচৰত আছে ১ লাখ টকা মূল্যৰ এটা ৰিভলভাৰ আৰু ৮০ হাজাৰ টকা দামৰ এটা পিষ্টল।

শপতনামাত যোগী আদিত্যনাথে আৰু দাবী কৰিছে যে তেওঁৰ নামত কোনো কৃষিভূমি বা মাটি–সম্পত্তি নাই।

উত্তৰ প্ৰদেশত তেওঁৰ নামত কোনো গাড়ী বা যান–বাহন পঞ্জীয়নভুক্ত নাই বুলিও দাবী কৰিছে যোগী আদিত্যনাথে। তেওঁৰ কোনো ঋণ বা বকেয়া নাই বুলিও উল্লেখ কৰে আদিত্যনাথে।

যোগী আদিত্যনাথে জনাইছে, ২০২০–২১ বিত্তীয় বৰ্ষত তেওঁৰ আয় আছিল ১৩ লাখ ২০ হাজাৰ ৬৫৩ টকা। ২০১৯–২০ বিত্তীয় বৰ্ষত তেওঁৰ আয় আছিল ১৫ লাখ টকাৰ অধিক।