ধৰ্ষণত বাধা, মহিলাৰ মুখত ঢালি দিলে এচিড, চুৰীৰে ফালি পেলালে তলপেট

প্ৰতিবেশীয়ে যেতিয়া শত্ৰুৰ ৰূপ লয়, তেতিয়া অৱস্থা কি হয়, এই ঘটনাই প্ৰমাণ কৰিলে।  এগৰাকী মহিলা অকলে থকাৰ সুযোগ লৈ ঘৰৰ প্ৰৱেশ কৰিলে প্ৰতিবেশী যুৱক। শ্লীলতাহানিৰ প্ৰতিবাদ কৰোতেই নিৰ্যাতিতাৰ মুখত ঢালি দিলে এচিড। লগতে হাতত থকা চুৰীৰে ফালি পেলালে মহিলাগৰাকীৰ তলপেট।

ঘটনাটো সংঘটিত হৈছে উত্তৰপ্ৰদেশত। য'ত ৩০ বছৰীয়া এগৰাকী মহিলাক আক্ৰমণ কৰে প্ৰতিবেশীয়ে। নিৰ্যাতিতা মহিলাগৰাকী ৩ সন্তানৰ সৈতে সেই ঠাইত অকলে থাকে। স্বামী কৰ্মসূত্ৰে দিল্লীত থাকে।

নিৰ্যাতিতা মহিলাগৰাকীক এতিয়া জিলাৰ হাস্পতালত ভৰ্তি কৰোৱা হৈছে। বৰ্তমান স্বাস্থ্যৰ অৱস্থা গুৰুতৰ। 

আৰক্ষীয়ে জনোৱা মতে,সোমবাৰে নিশা অভিযুক্ত সত্যেন্দ্ৰই মহিলাগৰাকীৰ ঘৰত জোৰকৈ প্ৰৱেশ কৰে। আৰম্ভ কৰে নিৰ্যাতন। কিন্তু মহিলাগৰাকীয়ে চিঞৰ বাখৰ কৰোতে প্ৰথমে সত্যেন্দ্ৰই মাৰপিট কৰে মহিলাগৰাকীক। পিছথ মুখত ঢালি দিয়ে এচিড। মহিলাগৰাকীৰ চিঞৰ শুনি স্থানীয় লোকে আৰক্ষীক খবৰ দিয়ে। 

প্ৰতিবেশীয়ে জনাইছে যে, আৰক্ষীয়ে প্ৰথমে ঘটনাটোত সহজ ভাবে লৈছিল।  কিন্তু তেতিয়াই মহিলাগৰাকীৰ এটা ভিডিও দেখুৱাই আৰক্ষীক। তাৰ পিছতে আৰক্ষীয়ে ক্ষীপ্ৰতাৰে তদন্ত আৰম্ভ কৰি অভিযুক্তক গ্ৰেপ্তাৰ কৰে।