শাহুৱে বোৱাৰী অত্যাচাৰ কৰা আৰু বোৱাৰীয়ে শাহুক ওলোটাই নিৰ্যাতন কৰাৰ কাহিনী হয়তো বহুবাৰ শুনিছে। পিছে এইবাৰ কথা বিষম। স্বামী আৰু শহুৰ দুয়ো সেনাবাহিনীৰ চাকৰিয়াল হেতু দুয়ো ঘৰৰ পৰা বেছিভাগ সময় আঁতৰি থাকে, ঘৰত থাকে কেৱল শাহু আৰু বোৱাৰী।
অকলশৰীয়া বোৱাৰীয়ে নিজৰ হতাশা দূৰ কৰিবলৈ বাছি লৈছিল এজন পৰকীয়া প্ৰেমিক। দিনটোৰ বেছিভাগ সময় সেই অবৈধ প্ৰেমিকৰ সৈতেই ফোনত কথা পতাত ব্যস্ত হৈ থাকে বোৱাৰীগৰাকী। পিছে ফোনত একেৰাহে লাগি থকা বোৱাৰীক বাৰে বাৰে হকা বধা কৰি আছিল শাহুৱে।
২০১৮চনত বিয়া হৈ অহাৰ পিছৰ পৰা স্বামী ঘৰত নথকাৰ সুযোগত প্ৰেমিকৰ সৈতে প্ৰেমত মছগুল হৈ থকা বোৱাৰীৰ কাৰণে শাহু হৈ উঠিছিল চকুৰ কুটা, দাঁতৰ শাল। শাহুৱে যাতে কোনো কাৰণত আৰু হকা–বধা কৰি থাকিব নোৱাৰে তাৰ কাৰণে শাহুক চিৰকাললৈ পৃথিৱীৰ পৰা আঁতৰাই পঠিওৱাৰ পৰিকল্পনা কৰিলে বোৱাৰী আৰু অবৈধ প্ৰেমিকে। কোনোৱে যাতে সন্দেহ নকৰে আৰু শাহুৱেকৰ মৃত্যু দুৰ্ঘটনা যেন লাগে তাৰকাৰণে সাপৰ খোঁটেৰে শাহুক হত্যা কৰাৰ অপচেষ্টা চলালে দুয়ো।
ভবামতেই কাম। শাহুক খুঁটি মাৰিবলৈ সাপ এৰি দিলে বোৱাৰী আৰু অবৈধ প্ৰেমিকে। বিষাক্ত সাপৰ খোঁটেৰে শাহুক হত্যা কৰি নিজৰ পৰকীয়া প্ৰেম আগুৱাই নিলে দুয়ো। কিন্তু এই হত্যাকাণ্ডৰ কেইটামান মাহৰ পিছত পৰিয়ালৰ লোকৰ সন্দেহ উপজে আৰু বোৱাৰীয়েকৰ বিৰুদ্ধে থানাত গোচৰ ৰুজু কৰে।
বোৱাৰীগৰাকীৰ লগতে তেওঁৰ অবৈধ প্ৰেমিকৰ নাম এফআইআৰত দাখিল কৰা হয়। উপযুক্ত তথ্য প্ৰমাণ পোৱাৰ পিছত দুয়োকে গ্ৰেপ্তাৰ কৰিছে আৰক্ষীয়ে।
