সোণত ধন বিনিয়োগ কৰিব বিচাৰে নেকি? ভুলতো বেংকৰ পৰা নিকিনিব সোণৰ মুদ্ৰা!

ভাৰতত বিনিয়োগ কৰাৰ বাবে সোণক আটাইতকৈ ভাল বিকল্প হিচাপে ধৰা হয়। বিগত কেইটামান বৰ্ষত বহু দাম বৃদ্ধি হ’ল সোণৰ। ভৱিষ্যতে আৰু বৃদ্ধিৰ সম্ভাৱনা আছে। সেয়েহে আপুনিও সোণত বিনিয়োগ কৰিলে হ’ব পাৰে লাভৱান। কিন্তু এই বিনিয়োগৰ বাবে বেংকৰ পৰা সোণৰ মুদ্ৰা নিকিনিব।

সোণত বিভিন্ন ধৰণে বিনিয়োগ কৰিব পাৰে। ইয়াৰ বাবে গ’ল্ড ইটিএফৰ লগতে Sovereign Gold Bondত বিনিয়োগ কৰিব পাৰিব।

ভৱিষ্যতৰ কথা ভাবি সোণৰ গহণাৰ সলনি সোণৰ মুদ্ৰাত বিনিয়োগ কৰা বেছি লাভজনক। সোণৰ মুদ্ৰা যেতিয়াই ইচ্ছা তেতিয়াই সলনি কৰি টকা লৈ যাব পাৰে। লগতে বিক্ৰী কৰাৰ সময়ত মেকিং চাৰ্জ বা ৱেষ্টেজ চাৰ্জ দিব নালাগে। সোণৰ গহণাৰ দৰে সোণৰ মুদ্ৰা সময়ৰ লগে লগে ক’লা নপৰে।

গহণাৰ দোকানৰ লগতে বেংকৰ পৰাও কিনিব পাৰিব সোণৰ মুদ্ৰা। বেংকত আপুনি ৯৯.৯ শতাংশ শুদ্ধ ২৪ কেৰেটৰ সোণৰ মুদ্ৰা পাব। বেংকত কে ৱাই চি কৰোৱা থাকিলে যিকোনো সময়তে বেংকৰ শাখাৰ পৰা সোণ কিনিব পাৰে।

ইয়াৰ উপৰি বেংকৰ ৱেবছাইটৰ পৰাও সোণৰ মুদ্ৰা কিনিব পাৰিব। কিন্তু বেংকৰ পৰা সোণৰ মুদ্ৰা নিকিনায় ভাল। এৰ সলনি আপুনি নিৰ্ভৰযোগ্য সোণৰ দোকানৰ পৰ সোণ কিনিব পাৰে।

কিয় বেংকৰ পৰা কিনিব নালাগে সোণ? বেংকত যি সোণৰ মুদ্ৰা পোৱা যায় সেয়া অত্যন্ত হাই কোৱালিটীৰ। এই সোণ ছুইজাৰলেণ্ড বা আন পশ্চিমীয়া দেশৰ পৰা আমদানি কৰা হয়। ইয়াৰ ফলত বেংকে এই মুদ্ৰাৰ দৰতকৈ ৭ বা ১০ শতাংশ বেছি দামত বিক্ৰী কৰে। ফলত বিনিয়োগৰ ফালৰ পৰা চালে বেংকৰ পৰা সোণৰ মুদ্ৰা কিনাটো লাভজনক নহয়।

লগতে আপুনি এই মুদ্ৰা বেংকত পুনৰ বিক্ৰী কৰিব নোৱাৰে। কাৰণ বেংকে সোণৰ মুদ্ৰা কিনাৰ ব্যৱসায় নকৰে। আপুনি সোণৰ দোকানত গৈ বিক্ৰী কৰিব লাগিব। আৰু তাত আপুনি পাব মাৰ্কেট প্ৰাইচ।