What is Nairobi Fly: নাকামোৰে, হুলেৰেও নিবিন্ধে, তাৰ পিছতো নাইৰোবিৰ ভয়ত কম্পমান ছিকিম! কিয় ইমান ভয়ংকৰ এই পতংগ?

নাইৰোবি ফ্লাইছৰ আক্ৰমণ ছিকিমত! ছিকিমৰ এখন ইঞ্জিনিয়াৰিং কলেজৰ শতাধিক শিক্ষাৰ্থী ‘নাইৰোবি ফ্লাইছ’ৰ সংস্পৰ্শলৈ অহাৰ পিছত ছালৰ গুৰুতৰ সংক্ৰমণত আক্ৰান্ত হৈছে। মঙলবাৰে কলেজখনৰ কৰ্মচাৰীয়ে জনায়, আন সংক্ৰমিত শিক্ষাৰ্থীসকলক ঔষধ দিয়া হৈছিল আৰু তেওঁলোক এতিয়া সুস্থ হৈ উঠিছে। পিটিআইৰ খবৰ অনুসৰি, ৰাজ্যৰ স্বাস্থ্য বিভাগে জনাইছে, ছিকিম মণিপাল ইনষ্টিটিউট অব টেকন’লজীৰ চৌহদত দ্ৰুতগতিত বৃদ্ধি পাইছে পূব আফ্ৰিকাৰ নাইৰোবি মাখি।

নাইৰোবি মাখি কেনিয়ান মাখি নামেৰেও পৰিচিত। ই এবিধ সৰু পোক আৰু ইয়াৰ দেহ দীঘলীয়া আকৃতিৰ। ইহঁত কমলা আৰু ক’লা ৰঙৰ হয় আৰু য’ত বেছি বৃষ্টিপাত হয় সাধাৰণতে সৈেইবোৰ অঞ্চলত অধিক পোৱা যায়। পোহৰ আৰু আৰ্দ্ৰ স্থানৰ প্ৰতি এই মাখি অধিক আকৃষ্ট হয়।

নাইৰোবি মাখিয়ে সাধাৰণতে ফচল নষ্ট কৰে আৰু কীট–পতংগ খায়। স্বাস্থ্য বিভাগৰ সূত্ৰৰ খবৰ, এই মাখিয়ে নাকামোৰে, হুলেৰেও নিবিন্ধে। কিন্তু যদি কাৰোবাৰ ছালত পৰাৰ সময়ত কোনো বাধা আহে তেন্তে এই মাখিয়ে এবিধ শক্তিশালী এচিডজাতীয় পদাৰ্থ নিৰ্গত কৰে যিয়ে ছাল পুৰি পেলায়।

এই পুৰি দিয়া বিষকক কোৱা হয় ‘পেডেৰিন’। ই নাইৰোবি মাখিৰ ভিতৰত থকা ছিম্বিঅ’টিক বেক্টেৰিয়াৰ দ্বাৰা উৎপাদিত। এই মাখিৰ শৰীৰৰ পৰা নিৰ্গত তৰল পদাৰ্থ ছালত পৰিলে অস্বাভাৱিক জ্বলন, ডাৰ্মাটাইটিছ সৃষ্টি কৰিব পাৰে।

এদিন দুদিনৰ ভিতৰত দেহত ফোহা ওলাই, কিন্তু এইবোৰ সাধাৰণতে শুকাই যায় আৰু দাগ হৈ থাকি নাযায়। আৰু গুৰুতৰ ক্ষেত্ৰত যদি বিষ শৰীৰত আৰু বিয়পি পৰে তেন্তে জ্বৰ, স্নায়ুৰ বিষ বা বমি হ’ব পাৰে। যদি এই বিষ মানুহৰ চকুৰ সংস্পৰ্শলৈ আহে তেন্তে জনজাংটিভাইটিছ আৰু সম্ৱাৱ্য অস্থায়ী অন্ধত্বৰ কাৰণো হ’ব পাৰে।

স্বাস্থ্য বিভাগে জনাইছে, এই মাখিক বিৰক্ত নকৰি বা স্পৰ্শ নকৰি শান্তভাৱে উৰুৱাই দিব লাগিব। এই মাখি য’ত পৰে সেই স্থান চাবোন পানীৰে ভালকৈ ধুই পেলাব লাগে। আঁঠুৱা ব্যৱহাৰ কৰিব লাগিব, দীঘল হাতৰ পোষাক পিন্ধিব লাগিব আৰু নিশা পোহৰৰ তলত বহা এৰাই চলিব লাগিব। মাখিবিধ মৰিলে তাৰ দেহ চূৰ্ণ–বিচূৰ্ণ কৰা উচিত নহয় কাৰণ ইয়াত শক্তিশালী বিষ আছে যাৰ ফলত ছালত সংক্ৰমণ হ’ব পাৰে।