Photos: আই চি ইউ ৱাৰ্ডত হোৱা এখন অনন্য বিবাহ, অসুস্থ মাতৃৰ শেষইচ্ছা পূৰণ কৰি কন্যাই মালা পিন্ধালে দৰাক, তাৰ পিছত?

বিহাৰৰ গয়াক মোক্ষৰ নগৰ বুলি গণ্য কৰা হয়। এই মোক্ষ বা মুক্তিৰ নগৰতে এখন বিবাহক লৈ হৈছে চৰ্চা। এখন ব্যক্তিগত চিকিৎসালয়ৰ আই চি ইউ ৱাৰ্ডত এনে এক অনন্য বিবাহ প্ৰত্যক্ষ কৰা গৈছিল, যি এগৰাকী মাতৃৰ শেষইচ্ছাৰ বাবে ৰূপায়ণ কৰা হৈছিল। দৰা-কইনাৰ লগতে চিকিৎসালয়ৰ সকলো কৰ্মীকে আৱেগিক কৰি তোলা এই ঘটনাৰ বিৱৰণী অনুসৰি পৰিস্থিতি অধিক বেয়া হোৱাত হাস্পতালত চিকিত্‍সাধীন পুনম কুমাৰী বাৰ্মাই পৰিয়ালৰ লোকক কয় যে তেওঁ জীয়াৰী বিবাহ চাই যাব বিচাৰে।

ভাৰতীয় সেনাবাহিনীৰ পৰা অৱসৰ লোৱা চেলেমপুৰ গাঁৱৰ বাসিন্দা বিদ্যুৎ কুমাৰ আম্বেদকাৰৰ অভিযন্তা পুত্ৰ সুমিত গৌৰৱৰ সৈতে ২৬ ডিচেম্বৰত চান্দনী কুমাৰীৰ এংগেজমেণ্ট ঠিক কৰা হৈছিল। যেতিয়া ছোৱালীজনীৰ মাতৃৰ স্বাস্থ্যৰ অৱনতি ঘটিল, তেতিয়া ছোৱালীজনীয়ে নিৰ্ধাৰিত এংগেজমেণ্টৰ তাৰিখৰ এদিন আগতে দুয়োৰে বিয়া পাতিবলৈ জোৰ দিলে। ইয়াৰ পিছত এই বিবাহ আই চি ইউত কৰা হ’ল।

এই বিবাহৰ বাবে ব্যক্তিগত চিকিৎসালয়খনে অনুমতি দিয়ে। দৰা-কইনাৰ সৈতে তেওঁলোকৰ আত্মীয়ই আই চি ইউত উপস্থিত হয়। আই চি ইউৰ বিচনাখনত চিকিৎসা সা-সৰঞ্জাম লৈ জীয়েক আৰু জোঁৱাইৰ ফালে চাই থাকে মাতৃয়ে। এই সময়ছোৱাত পণ্ডিতে দুয়োকে বিবাহ জীৱনৰ শপত খুৱাই দুয়োৰে বিবাহকাৰ্য সমাপন কৰে।

দুখৰ কথাটো হ’ল বিয়াৰ মাত্ৰ দুঘণ্টাৰ পিছতেই ছোৱালীজনীৰ মাতৃৰ মৃত্যু হয়। বিয়াৰ মাত্ৰ দুঘণ্টাৰ পিছতে মাতৃক হেৰুৱাই শোকত ভাগি পৰে কন্যা আৰু নতুন জোঁৱায়েকৰ লগতে সকলো পৰিজন। মাতৃ পুনম কুমাৰী বাৰ্মাই ইচ্ছা পূৰণৰ মাজেৰে প্ৰাপ্ত কৰা মোক্ষৰ কথায়ো সকলোকে বিস্মিত কৰিছিল।

মগধ চিকিৎসা মহাবিদ্যালয় আৰু চিকিৎসালয়ত এএনএম হিচাপে কৰ্মৰত মাতৃগৰাকী কৰ’নাৰ সময়ৰ পৰা অবিৰতভাৱে অসুস্থ হৈ আছিল। হৃদৰোগত আক্ৰান্ত মাতৃৰ অৱস্থা বেয়া হৈ গৈ থাকিল আৰু যেতিয়া চিকিৎসকে ক’বলৈ ধৰিলে যে তেওঁৰ জীৱন ৰক্ষা কৰাটো কঠিন, তেতিয়াই মাতৃৰ ইচ্ছা পূৰণৰ বাবে চিকিৎসালয়ত বিয়াৰ ব্যৱস্থা কৰা হয়।