ৰহস্য! হোটেলৰ কোঠাত ক্ষত-বিক্ষত অৱস্থাত উদ্ধাৰ জনপ্ৰিয় অভিনেত্ৰীৰ মৃতদেহ

অপ্ৰত্যাশিত ভাবে তামিল অভিনেত্ৰী ভি জে চিত্ৰাৰ মৃতদেহ উদ্ধাৰ হৈছে হোটেলৰ কোঠাত। জনপ্ৰিয় অভিনেত্ৰী ভি জে চিত্ৰাৰ মৃতদেহ ক্ষত বিক্ষত অৱস্থাত উদ্ধাৰ হৈছে  হোটেলখনৰ বাথৰুমত।

বিজয় টিভিৰ ‘পাণ্ডিয়ান ষ্টোৰচ’ নামৰ ধাৰাবাহিক খনৰ মুল্লাই নামৰ চৰিত্ৰত অভিনয় কৰি বেচ জনপ্ৰিয়তা অৰ্জন কৰিছিল এই অভিনেত্ৰীগৰাকীয়ে। প্ৰাথমিক তদন্তত অভিনেত্ৰীগৰাকীয়ে আত্মহত্যা কৰা বুলিয়েই সন্দেহ কৰা হৈছে। 

খবৰ অনুসৰি, ২৮ বছৰীয়া চিত্ৰাই ইভিপি ফিল্ম চিটিৰ পৰা শ্বুটিং শেষ কৰি হোটেলৰ নিজৰ কোঠালৈ আহিছিল নিশা ২.৩০ বজাত। চিত্ৰা কেইবামাহ ধৰি হেমন্ত নামৰ এজন ব্যৱসায়ীৰ সৈতে সম্পৰ্কত আছিল। সেইদিনাও প্ৰেমিকৰ সৈতেই আছিল অভিনেত্ৰীগৰাকী।

হেমন্তই জনাই যে, ‘শ্বুটিৰ পৰা আহি চিত্ৰা বাথৰুমলৈ গৈছিল। কিন্তু বাথৰুমত প্ৰৱেশ কৰাৰ পিছত বহু সময় ধৰি বাহিৰলৈ অহা নাছিল চিত্ৰা। বাহিৰৰ পৰা মাত দিয়াৰ পিছতো পোৱা নাছিল কোনো ধৰণৰ সঁহাৰি। তেতিয়াই হেমন্তই হোটেলৰ এগৰাকী কৰ্মীক মাতে। ডুপ্লিকেট চাবিৰে দৰ্জা খোলাৰ পিছতে অভিনেত্ৰীগৰাকীৰ মৃতদেহ উদ্ধাৰ কৰা হয়।

স্থানীয় আৰক্ষীয়ে এই ৰহস্যজনক মৃত্যুৰ এটা ফাইল প্ৰস্তুত কৰিছে। ইতিমধ্যে আৰম্ভ কৰিছে তদন্ত প্ৰক্ৰিয়া। চেন্নাইৰ জীয়ৰী ভি জে চিত্ৰাই ২০১৩ চনত আৰম্ভ কৰিছিল নিজৰ কেৰিয়াৰ।