মানি লোৱা নাছিল বিয়াৰ প্ৰস্তাৱ! জনপ্ৰিয় বলীউদৰ অভিনেত্ৰীক চুৰীৰে আঘাত প্ৰেমিকৰ

বিয়াৰ প্ৰস্তাৱ মানি লোৱা নাছিল, আৰু এয়াই হ’ল অপৰাধ। বিয়াৰ প্ৰস্তাৱ মানি নোলোৱাৰ বাবেই  চুৰীৰে আক্ৰমণ কৰে বলীউদ, হিন্দী টেলিভিশ্যনৰ অভিনেত্ৰী মালভি মালহোত্ৰাক। গুৰুতৰ অৱস্থাত অভিনেত্ৰীগৰাকীক মুম্বাইৰ কোকিলাবেন ধীৰুভাই আম্বানী হাস্পতালত ভৰ্তি কৰোৱা হয়।

সোমবাৰে নিশা মুম্বাইৰ ভাৰছেভায়ত এই ঘটনা সংঘটিত হৈছে বুলি জনাইছে আৰক্ষীয়ে। আহত অভিনেত্ৰীগৰাকীয়ে জনোৱা মতে, আক্ৰমণ কৰা যুৱকজন তেওঁৰ বন্ধু। পেছাত এগৰাকী চলচিত্ৰ প্ৰযোজক। নাম যোগেশকুমাৰ মহিপাল সিং।

আক্ৰমণৰ চিকাৰ হোৱা অভিনেত্ৰী মালভি মলহোত্ৰা ইণ্ডাষ্ট্ৰীৰ জনপ্ৰিয় মুখ। টেলিভিশ্যনৰ উড়ান চিৰিয়েলত অভিনয় কৰিছিল।সম্প্ৰতি হোটেল মিলন নামৰ এখন চিনেমাত চুক্তিবদ্ধ হৈছিল অভিনেত্ৰীগৰাকী। এবছৰ পূৰ্বে যোগেশকুমাৰ মহিপাল সিঙৰ সৈতে ফেচবুক যোগে চিনাকী হৈছিল অভিনেত্ৰীগৰাকী। কিছুদিন পূৰ্বে যোগেশকুমাৰ মহিপাল সিঙে বিবাহৰ প্ৰস্তাৱ দিয়ে মালভিক। কিন্তু এই প্ৰস্তাৱ মানি লোৱা নাছিল অভিনেত্ৰীগৰাকীয়ে। আৰু সেইকাৰণেই আক্ৰমণৰ বলি হয় অভিনেত্ৰীগৰাকী।

সোমবাৰে ডুবাইৰ পৰা মুম্বাইলৈ উভতি অহাৰ পিছত এখন কেফেলৈ গৈছিল মালভি। সেইসময়ত চুৰীৰে আঘাত কৰে অভিনেত্ৰীগৰাকীক। আক্ৰমণৰ ফলত অভিনেত্ৰীগৰাকীয়ে পেট আৰু দুয়োখন হাতত  গুৰুতৰ ভাবে আহত হয়।

যোগেশ কুমাৰ মহিপাল সিঙৰ বিৰুদ্ধে এতিয়া গোচৰ ৰুজু কৰিছে আৰক্ষীয়ে।