অৱশেষত মুক্তি পালে কংগ্ৰেছ সাংসদ শশী থাৰুৰে। ২০১৪ চনত মৃত্যু হৈছিল তেওঁৰ পত্নী তথায ব্যৱসায়ী সুনন্দা পুষ্কৰৰ। সেই ৰহস্যজনক মৃত্যুত শশী থাৰুৰৰ বিৰুদ্ধে উঠিছিল আত্মহত্যাত প্ৰৰোচনা দিয়াৰ অভিযোগ। সেই গোচৰৰ পৰা অৱশেষত নিস্তাৰ পালে কংগ্ৰেছ নেতাগৰাকীয়ে। ২০১৪ চনত ১৬ জানুৱাৰীত পাকিস্তানী সাংবাদিক মেহৰ তাৰাৰ সৈতে টুইটাৰত চলিছিল বাকযুদ্ধ। এই পাক সাংবাদিকগৰাকীৰ সৈতে সেই সময়ত শশী থাৰুৰৰ বিবাহ বহিৰ্ভূত সম্পৰ্ক আছিল বুলি অভিযোগ উঠিছিল। ইয়াৰ ঠিক পিছৰ দিনা অৰ্থাৎ ১৭ জানুৱাৰীত দিল্লীৰ লীলা পেলেচ হোটেলৰ পৰা উদ্ধাৰ হয় সুনন্দাৰ মৃতদেহ। মৰণোত্তৰ পৰীক্ষাৰ ৰিপ’ৰ্টত দেখা যায় মৃত্যুৰ কাৰণ বিষক্ৰিয়া। ইয়াৰ পিছত চিকিৎসকসকলৰ কিছু ৰিপ’ৰ্টত দেখা যায়, সুনন্দাৰ হাতত আঘাতৰ চিন আছে। আনকি মুখতো আছে আঘাতৰ চিন। তদন্তৰ দায়িত্ব লয় দিল্লী আৰক্ষীয়ে। আনহাতে, এইমছৰ চিকিৎসকসকলে দাবী কৰে, তেওঁলোকক মৰণোত্তৰ পৰীক্ষাৰ ৰিপ’ৰ্ট সলনি কৰাৰ বাবে জোৰ কৰা হৈছিল। ২০১৫ৰ জানুৱাৰীত দিল্লী আৰক্ষীয়ে জনায় এয়া আত্মহত্যা নহয়। হত্যা। মৃত্যুৰ পূৰ্বে শেষবাৰৰ বাবে সুনন্দাৰ সৈতে কথা হৈছিল সাংবাদিক নলিনী সিঙৰ। শশী থাৰুৰৰ বিৰুদ্ধে ভাৰতী দণ্ডবিধিৰ ৪৯৮ত পাৰিবাৰিক হিংসা আৰু ৩০৬ আত্মহত্যাত প্ৰৰোচনাৰ ধাৰাত অভিযোগ আনে দিল্লী আৰক্ষীয়ে। অৱশেষত এই গোচৰৰ মুক্ত হয় থাৰুৰ।
