দেশৰ বৃহত্তম বেংক ভাৰতীয় ষ্টেট বেংকৰ এটিএমত জালিয়াতিৰ ঘটনা দিনক দিনে বৃদ্ধি পাইছে। এনেধৰণৰ জালিয়াতি নিয়ন্ত্ৰণ কৰিবলৈ এটিএমৰ পৰা নগদ ধন উলিওৱাৰ ক্ষেত্ৰত নিয়মৰ সলনি কৰা হ’ব। এতিয়াৰ পৰা এটিএমত ৱান টাইম পাছৱৰ্ত (অ’টিপি) ব্যৱহাৰ কৰা হ’ব।
১৮ ছেপ্টেম্বৰৰ পৰা দেশজুৰি এছবিআই এটিএমত এই নিয়ম প্ৰযোজ্য হ’ব। ইয়াৰ পূৰ্বে জালিয়াতি ৰোধ কৰাৰ বাবে ১ জানুৱাৰীৰ পৰা নিশাৰ ভাগত অ’টিপিৰ ব্যৱস্থা আৰম্ভ কৰিছিল এছবিআয়ে। ইয়াৰ ফলতনিশা ৮ বজাৰ পৰা পুৱা ৮ বজালৈ এছ বি আই এটিএমৰ পৰা ১০ হাজাৰ টকা বা তাৰ অধিক উলিওৱাৰ সময়ত অ’টিপিৰ প্ৰয়োজন হৈছিল।
এইবাৰ এটিএমৰ পৰা টকা উলিওৱাৰ ক্ষেত্ৰত ২৪ ঘণ্টাই অ’টিপি ব্যৱহাৰৰ লগতে এছবিআইৰ এটিএমৰ পৰা ধন উলিওৱাৰ ক্ষেত্ৰত সুৰক্ষা ব্যৱস্থা আৰু অধিক বৃদ্ধি কৰাৰ ওপৰত গুৰুত্ব দিছে।
অ’টিপিৰ জৰিয়তে ধন উলিওৱাৰ সুবিধা কেৱল এছবিআইৰ এটিএমতহে উপলব্ধ কাৰণ নন এছবিআই এটিএমসমূহত নেচনেল ফিনান্সিয়েল ছুইচ তৈয়াৰ নহয়। অ’টিপি ছিষ্টেম–জেনেৰেটেড নিউমাৰিক ষ্ট্রিং যিয়ে এবাৰৰ বাবে ধন লেনদেনৰ প্ৰমাণৰ ক্ষেত্ৰত সহায় কৰিব। গ্ৰাহকসকলে এটিএমৰ পৰা উলিওৱা টকাৰ পৰিমাণ লিখাৰ পিছতে এটিএমৰ স্ক্ৰীণত অ’টিপি বিচাৰিব। নিজৰ ৰেজিষ্টাৰ্ড মোবাইল অহা অ’টিপি তাত বহুৱাব লাগিব।
এছবিআইৰ মেনেজিং ডিৰেক্টৰ চি এছ শেঠীয়ে কয়, ‘এছবিআই প্ৰযুক্তিগত উন্নতি আৰু নিৰাপত্তা বৃদ্ধিৰ জৰিয়তে গ্ৰাহকসকলৰ সুবিধা নিশ্চিত কৰাৰ ক্ষেত্ৰত সদায় আগত। আমি নিশ্চিত যে অ’টিপি স্বীকৃত এটিএমৰ ফলত এছবিআইৰ গ্ৰাহকসকলে নিৰাপদে টকা উলিওৱাৰ ক্ষেত্ৰত সহায় কৰিব।
এছবিআই এটিএমৰ পৰা নগদ ধন উলিয়াবলৈ গ’লে গ্ৰাহসকলে পিন নম্বৰসহ এটা অ’টিপি দিব লাগিব। এই অ’টিপি আহিব বেংকৰ সৈতে লিংক থকা মোবাইল নম্বৰত।
