Narendra Modi : সম্পূৰ্ণ বিনামূলীয়াকৈ গেছ চিলিণ্ডাৰ! আজি উজ্জ্বলা–২.০ৰ উদ্বোধন কৰিব নৰেন্দ্ৰ মোদীয়ে

মঙলবাৰে দুপৰীয়া উত্তৰ প্ৰদেশত উজ্জ্বলা যোজনাৰ দ্বিতীয় সংস্কৰণ আনুষ্ঠানিকভাৱে উদ্বোধন কৰিব প্ৰধানমন্ত্ৰী নৰেন্দ্ৰ মোদীয়ে। এই ভাৰ্ছুৱেল অনুষ্ঠানত এই আঁচনিৰ হিতাধিকাৰীসকলৰ সৈতেও কথা পাতিব মোদীয়ে। সোমবাৰে সন্ধিয়া টুইট কৰি এই ঘোষণা কৰিছে স্বয়ং প্ৰধানমন্ত্ৰীগৰাকীয়ে। অৱশ্যে প্ৰধানমন্ত্ৰী কাৰ্যালয়ৰ ফালৰ পৰা পূৰ্বেই এই বিষয়ে জনোৱা হৈছিল।

দেওবাৰে এক প্ৰেছ বিজ্ঞপ্তিত প্ৰধানমন্ত্ৰী কাৰ্যালয়ে জনাইছিল, মঙলবাৰে দুপৰীয়া চাৰে ১২টা বজাত ভিডিঅ’ কনফাৰেন্সৰ জৰিয়তে উত্তৰ প্ৰদেশৰ মাহোবা জিলাত প্ৰধানমন্ত্ৰী উজ্জ্বলা যোজনাৰ দ্বিতীয় সংস্কৰণৰ উদ্বোধন কৰিব মোদীয়ে।

সোমবাৰে সন্ধিয়া টুইটত মোদীয়ে লিখিছিল, ‘দেশৰ উন্নয়নৰ পথত ১০ আগষ্ট দিনটো বিশেষ দুপৰীয়া চাৰে ১২টা বজাত উত্তৰ প্ৰদেশৰ মাহোবাৰ মানুহৰ হাতত তুলি দিয়া হ’ব উজ্জ্বলা যোজনাৰ দ্বিতীয় সংস্কৰণৰ এলপিজি সংযোগ। এই আঁচনিৰ হিতাধিকাৰীসকলৰ সৈতেও কথা–বাৰ্তা হ’ব।’

প্ৰধানমন্ত্ৰী কাৰ্যালয়ৰ পৰা জনোৱা হৈছে, উজ্জ্বলা যোজনাৰ দ্বিতীয় সংস্কৰণৰ আওতাত বিনামূলীয়া ৰন্ধন গেছৰ সংযোগৰ উপৰি এটাকৈ হয়প্লেট পাব দৰিদ্ৰ মহিলাসকলে। লগতে প্ৰথমবাৰৰ এলপিজি চিলিণ্ডাৰো বিনামূলীয়াকৈ দিয়া হ’ব। তদুপৰি এই আঁচনিত নাম অন্তৰ্ভুক্ত কৰাৰ প্ৰক্ৰিয়াও সৰল কৰা হৈছে।

উজ্জ্বলা যোজনাৰ দ্বিতীয় সংস্কৰণত নামমাত্ৰ নথি–পত্ৰ দেখুৱাই বিনামূলীয়া ৰন্ধন গেছ লাভ কৰিব দৰিদ্ৰ সীমাৰেখাৰ তলত থকা পৰিয়ালৰ মহিলাসকলে।

২০১৬ চনত প্ৰথমবাৰ উজ্জ্বলা যোজনা আৰম্ভ হয়। সেইবাৰ দৰিদ্ৰ সীমাৰেখাৰ তলৰ ৫ কোটি মহিলাক এই যোজনাৰ আঁতালৈ অনাৰ লক্ষ্য আছিল।