ল’ক ডাউন নে অন্য পৰিকল্পনা? ৭ খন ৰাজ্য আৰু কেন্দ্ৰীয়শাসিত অঞ্চলৰ মুখ্যমন্ত্ৰীৰ সৈতে বৈঠক প্ৰধানমন্ত্ৰীৰ

দেশৰ ভিতৰতে আটাইতকৈ যিকেইখন ৰাজ্য আৰু কেন্দ্ৰীয় শাসিত অঞ্চলত কোৰোণাত আক্ৰান্তৰ সংখ্যা বাঢ়িছে, সেইকেইখন ৰাজ্যৰ মুখ্যমন্ত্ৰীৰ সৈতে বৈঠকত মিলিত হৈছে প্ৰধানমন্ত্ৰী নৰেন্দ্ৰ মোদী। বুধবাৰে ৰাজ্যকেইখনৰ মুখ্যমন্ত্ৰী সকলৰ সৈতে ভাৰ্চুৱেল বৈঠকত অংশগ্ৰহণ প্ৰধানমন্ত্ৰীগৰাকীৰ।

মহাৰাষ্ট্ৰ, অন্ধ্ৰপ্ৰদেশ, কৰ্ণাটক, উত্তৰ প্ৰদেশ, তামিলনাডুু, দিল্লী আৰু পঞ্জাৱৰ মুখ্যমন্ত্ৰীৰ অংশগ্ৰহণ বৈঠকত।

উল্লেখযোগ্য যে, এই কেইখন ৰাজ্য তথা কেন্দ্ৰীয় শাসিত অঞ্চলত আটাইতকৈ বেছি লোক কোৰোণাত আক্ৰান্ত হৈছে। দেশৰ প্ৰায় ৭৭ শতাংশ কোৰোণাত মৃত্যু হোৱা লোক এই  কেইখন ৰাজ্যৰে। ৬৫.৫ শতাংশ কোৰোণাত আক্ৰান্ত কেৱল এই কেইখন ৰাজ্যৰে। গতিকে ৰাজ্য কেইখনত কি ব্যৱস্থা লোৱা যায়, সেই সন্দৰ্ভতে আয়োজন কৰা হৈছে বৈঠক।

কিদৰে হৈছে কোৰোণাৰ চিকিত্‍সা, কি কি ব্যৱস্থা গ্ৰহণ কৰিছে ৰাজ্য কেইখনে? আদি আটাইবোৰ দিশ পৰ্যালোচনা কৰা হ’ব বৈঠকত।

কোৰোণাৰ চিকিত্‍সাৰ বাবে নিৰ্বাচিত হাস্পতালত পৰ্যাপ্ত পৰিমাণৰ অক্সিজেনৰ ব্যৱস্থা কৰা হৈছে নে নাই, সেই দিশতো আলোচনা চলিব বৈঠকত।  ইয়াৰ উপৰিও, কেন্দ্ৰৰ পৰা কণ্টেইনমেণ্ট জ’ন, কোৰোণা ক্লীনিক মেনেজমেণ্ট, কোৰোণা পৰীক্ষাৰ বাবে মাল্টি ডিচিপ্লিনাৰি দল সাজু কৰি ৰখা হৈছে।  গতিকে প্ৰয়োজন হ’লে এই কেইখন ৰাজ্যত সেইসকলক নিয়োজিত কৰা হ’ব।

ইয়াৰ উপৰিও প্ৰধানমন্ত্ৰী নৰেন্দ্ৰ মোদীয়ে কোৰোণাৰ শেহতীয়া পৰিস্থিতিৰ সন্দৰ্ভত সঘনে প্ৰতিখন ৰাজ্যৰ মুখ্যমন্ত্ৰীৰ সৈতে আলোচনা কৰিছে।