New Parliament Building | Narendra Modi: ত্ৰিকোণীয় অট্টালিকা, চিকচিকিয়া সংসদ কক্ষ! শীঘ্ৰেই মুকলি হ'বলগীয়া দেশৰ নতুন সংসদ ভৱনৰ ছবি চাওক

প্ৰধানমন্ত্ৰী নৰেন্দ্ৰ মোদীৰ সপোনৰ নতুন সংসদ ভৱন ২৮ মে’ত উদ্বোধন কৰা হ'ব। নতুন সংসদ ভৱন নিৰ্মাণৰ খৰচক লৈ বিৰোধীৰ মাত প্ৰতিক্ৰিয়াৰ মাজতে প্ৰধানমন্ত্ৰী নৰেন্দ্ৰ মোদীয়ে সংসদ ভৱন উদ্বোধন কৰিবলৈ ওলাইছে।

কংগ্ৰেছৰ সভাপতি মল্লিকাৰ্জুন খাৰ্গেই দেশৰ ৰাষ্ট্ৰপতি দ্ৰৌপদী মুৰ্মুক উদ্বোধনী অনুষ্ঠানত অংশগ্ৰহণৰ বাবে নিমন্ত্ৰণ নজনোৱাক লৈ প্ৰতিক্ৰিয়া প্ৰকাশ কৰিছে। ৰাহুল গান্ধীয়েও প্ৰশ্ন উত্থাপন কৰে যে দেশৰ ৰাষ্ট্ৰপতিৰ থকা সত্ত্বেও প্ৰধানমন্ত্ৰীয়ে নতুন সংসদ ভৱনটো কেনেকৈ উদ্বোধন কৰিব?

তদুপৰি নতুন সংসদ ভৱনৰ উদ্বোধনী দিনটোক লৈও বিতৰ্কৰ সৃষ্টি হৈছে। প্ৰসংগক্ৰমে ২৮ মে’ত হিন্দুত্ববাদী নেতা বিনায়ক সাভাৰকাৰৰ জন্মদিন। সংসদ ভৱনৰ উদ্বোধনী অনুষ্ঠানৰ বাবে সেই দিনটো কিয় বাছনি কৰা হ’ল সেই সন্দৰ্ভতো বিৰোধীয়ে প্ৰশ্ন উত্থাপন কৰিছে। আনকি কংগ্ৰেছৰ লগতে বিৰোধী দলসমূহে ২৮ মে’ৰ উদ্বোধনী অনুষ্ঠান বৰ্জন কৰাৰ বিষয়েও আলোচনা কৰিছে।

২০২১ চনৰ ১৫ জানুৱাৰীত এই ত্ৰিকোণীয় ভৱন নিৰ্মাণৰ কাম আৰম্ভ হয় ২০২২ চনৰ আগষ্টৰ ভিতৰত সম্পূৰ্ণ হোৱাৰ কথা আছিল যদিও পিছত জানিব পৰা যায় যে জি-২০ সন্মিলনৰ সময়ৰ আশে পাশে ইয়াক উদ্বোধন কৰা হ’ব। উল্লেখ্য অট্টালিকা নিৰ্মাণৰ আধাৰশিলা অনুষ্ঠানলৈও নিমন্ত্ৰণ কৰা হোৱা নাছিল তেতিয়াৰ ৰাষ্ট্ৰপতি ৰামনাথ কোবিন্দক।

জনা যায় যে এই নতুন অট্টালিকাটো নিৰ্মাণৰ ব্যয় প্ৰায় ৯৭০ কোটি যদিও অতিৰিক্ত ২৮২ কোটি টকা খৰচৰ কথাও ওলাইছিল

৬৪,৫০০ বৰ্গমিটাৰ এলেকাত নিৰ্মিত চাৰি মহলীয়া এই নতুন ভৱনটোত ১২২৪জন সাংসদ থাকিব পাৰে। নতুন সংসদ ভৱনটোত তিনিখন মূল গেট আছে, সেয়া হৈছে– জ্ঞান দ্বাৰ, শক্তি দ্বাৰ আৰু কৰ্মদ্বাৰ।

এই ভৱনটোত সাংসদ, ভিআইপি আৰু দৰ্শনাৰ্থীৰ বাবে সুকীয়া প্ৰৱেশদ্বাৰ থাকিব।

এই ভৱনটোৰ আন এক উল্লেখযোগ্য দিশ হ’ল দেশৰ গণতান্ত্ৰিক ঐতিহ্যক উজ্জ্বল কৰি তুলিবলৈ নিৰ্মাণ কৰা সংবিধান প্ৰেক্ষাগৃহ। ভাৰতৰ মূল সংবিধানৰ প্ৰতিলিপি এটা হলঘৰত ৰখা বুলি কোৱা হয়।

ইয়াত এটা পুথিভঁৰাল, কেইবাটাও কমিটি কক্ষ আৰু ডাইনিং ৰুম আছে।

নতুন সংসদ ভৱনত মহাত্মা গান্ধী, জৱাহৰলাল নেহৰু, সুভাষ চন্দ্ৰ বসুকে ধৰি দেশৰ অন্যান্য প্ৰধানমন্ত্ৰীৰ প্ৰতিকৃতি থাকিব।