PM Modi's Mother| Gujrat: ১০০ বছৰীয়া হৈয়ো পাতিলে হাঁহি মুখে লাইন! সকলোকে মুগ্ধ কৰিলে প্ৰধানমন্ত্ৰী মোদীৰ মাতৃয়ে!

ভোট দিলে প্ৰধানমন্ত্ৰী নৰেন্দ্ৰ মোদীৰ মাতৃ হীৰাবেন মোদীয়ে। দেওবাৰে গুজৰাটৰ গান্ধীনগৰৰ ভোটকেন্দ্ৰত অসুখীয়া শৰীৰেই লাইন পাতিলে হীৰাবেন মোদীয়ে। নিজৰ গণতান্ত্ৰিক অধিকাৰ আৰু দায়িত্ব পাহৰি নগৈ এগৰাকী দায়িত্বশীল নাগৰিকৰ পৰিচয় দিলে শতায়ু গৰকা মোদীৰ মাতৃয়ে।

গুজৰাটৰ মুখ্যমন্ত্ৰী হিচাপে ভূপেন্দ্ৰ পেটেলে দায়িত্ব গ্ৰহণৰ পিছত এয়াই আছিল  প্ৰথম নিৰ্বাচন। গান্ধীনগৰ পৌৰসভাৰ ১১টা ৱাৰ্ডৰ ৪৪ জন কাউঞ্চিলাৰক নিৰ্বাচন কৰা হ'ব এই নিৰ্বাচনৰ জৰিয়তে। দেওবাৰে পুৱাৰ পৰা সকলো ৱাৰ্ডতে হ'ল ভোটগ্ৰহণ। আৰু তাৰে ভিতৰত চহৰৰ ৰায়সান গাঁৱৰ ভোটকেন্দ্ৰত ভোট দিবলৈ আহে হীৰাবেন মোদীয়ে।

বিজেপিৰ দখলত আছে গান্ধীনগৰ পৌৰসভা। যোৱা এপ্ৰিলতে নিৰ্বাচন হোৱা কথা আছিল।কিন্তু কোভিডৰ বাবে হোৱা নাছিল ভোটগ্ৰহণ। অৱশেষত অক্টোবৰত নিৰ্বাচন অনুষ্ঠিত হয়।  এইবাৰৰ নিৰ্বাচনত বিজেপিৰ বিৰুদ্ধে যুঁজ দিছে আম আদমী পাৰ্টীয়ে।

প্ৰসংগত, দেশৰ প্ৰধানমন্ত্ৰী হিচাপে নৰেন্দ্ৰ মোদীয়ে শপত লোৱাৰ সময়ৰ পৰাই মাতৃ হীৰাবেনো দেশবাসীৰ বাবে চিনাকী হৈ পৰে। নতুন দায়িত্ব গ্ৰহণৰ পূৰ্বে মাতৃৰ আশীৰ্বাদ ল'বলৈ গুজৰাটৰ ঘৰলৈ গৈছিল প্ৰধানমন্ত্ৰী মোদীয়ে। 

যোৱা ১৭ ছেপ্তেম্বৰত আছিল মোদীৰ জন্মদিন। সেইদিনাও মাতৃৰ আশীৰ্বাদ ল'বলৈ গান্ধীনগৰলৈ গৈছিল মোদী। সেই ফটো দেখি মুগ্ধ হৈ পৰিছিল সকলো।