Shraddha Murder Case: প্ৰেমিকাৰ মৃতদেহ খণ্ড-বিখণ্ড কৰিবলৈ আফতাবক প্ৰয়োজন হৈছিল ১০ ঘণ্টা, তাৰ পিছত পান কৰিছিল বিয়েৰ আৰু নেটফ্লিক্সত বিচাৰিছিল উপায়

দিল্লীৰ দেশ কঁপোৱা শ্ৰদ্ধা হত্যাকাণ্ডত দুটা নতুন চৰিত্ৰৰ সন্ধানত ব্যস্ত আৰক্ষী। প্ৰথম চৰিত্ৰৰ নাম বদ্ৰী আৰু দ্বিতীয় চৰিত্ৰৰ নাম ৰোহণ। তদন্তত প্ৰকাশ পাইছে যে আফতাবে শ্ৰদ্ধাৰ সৈতে ফুৰিবলৈ যোৱাৰ সময়ত হিমাচল প্ৰদেশত বাস কৰা বদ্ৰীক লগ পাইছিল। আফতাবে বদ্ৰীক কৈছিল যে তেওঁ গুৰুগ্ৰামত কাম কৰে আৰু ভাড়াত ঘৰ এটা লৈ ছাটাৰপুৰ অঞ্চলত থাকিব বিচাৰে। ইয়াৰ পিছত বদ্ৰীয়ে আফতাবক কৈছিল যে তেওঁ ছাটাৰপুৰত থাকে আৰু ভাড়াত ঘৰ এটা দিব পাৰে। আফতাব দিল্লীলৈ আহোঁতে বদ্ৰীৰ লগত যোগাযোগ কৰিলে। দ্বিতীয় চৰিত্ৰটো হৈছে ৰোহণ। বদ্ৰীয়েই আফতাবক ছাটাৰপুৰত থকা ৰোহণৰ লগত চিনাকি কৰাই দিছিল। ৰোহণে আফতাবক ৯০০০ টকা ভাড়াত এটা ঘৰ দিছিল। ৰোহণেই সেই ঘৰৰ তত্ত্বাৱধায়ক। আফতাবে প্ৰতিমাহে ভাড়া ৰোহণৰ একাউণ্টত জমা দিছিল। আৰক্ষীৰ সূত্ৰৰ মতে, এতিয়া এই দুয়োজন লোক নিৰুদ্দেশ হৈছে। দুয়োকে বিচাৰি আছে আৰক্ষীয়ে।

ইফালে আফতাবৰ ঘৰৰ সমীপত ৰখা জাবৰত ভেকুৱাম ক্লিনাৰৰ বাকচ এটাও উদ্ধাৰ হৈছে। ইয়াৰ সমান্তৰালকৈ অনলাইনত অৰ্ডাৰ কৰা খাদ্যৰ পেকেটো উদ্ধাৰ হৈছে। এইবোৰত খাদ্যৰ বিলো আছে, যি ২ নৱেম্বৰৰ। এই বিলখনত আফতাবৰ নাম লিখা আছে। ইয়াৰ লগতে ৰেডিমেড চাহৰ পেকেটো পোৱা গৈছে। ইয়াৰ পৰা অনুমান কৰিব পাৰি যে আফতাবৰ প্ৰচেষ্টা আছিল যে তেওঁ অন্ততঃ ৰাস্তাত যাতে বেছিকৈ ওলাব নালাগে। জনসাধাৰণৰ দৃষ্টিত কম দৃশ্যমান হোৱাটোৱেই হয়তো ইয়াৰ আঁৰৰ উদ্দেশ্য।

আৰক্ষীৰ সূত্ৰৰ উদ্ধৃতিৰে খবৰ পোৱা গৈছে যে দিল্লী আৰক্ষীৰ হাতত এতিয়াও আফতাবৰ বিৰুদ্ধে কোনো প্ৰত্যক্ষ প্ৰমাণ নাই। শীঘ্ৰে এই গোচৰৰ তদন্ত দিল্লী আৰক্ষীৰ ক্ৰাইম ব্ৰাঞ্চলৈ হস্তান্তৰ হ’ব পাৰে। হত্যাকাণ্ডৰ কোনো প্ৰত্যক্ষ সাক্ষী নাই, এতিয়ালৈকে এনে কোনো ভিডিঅ’ প্ৰকাশ পোৱা নাই য’ত আফতাবক শ্ৰদ্ধাৰ টুকুৰা কঢ়িয়াই লৈ ফুৰা দেখা গৈছে। এই পৰ্যন্ত উদ্ধাৰ হোৱা নাই শ্ৰদ্ধাৰ মোবাইল ফোন বা হত্যাৰ অস্ত্ৰ। ডি এন এ ৰিপ'ৰ্ট ৩ সপ্তাহৰ পৰা ৩ মাহৰ ভিতৰত আহে, গতিকে উদ্ধাৰ হোৱা হাড়বোৰ শ্ৰদ্ধাৰ হওক বা নহওক, তেতিয়ালৈকে ছাছপেন্স অক্ষত থাকিব। এতিয়ালৈকে আৰক্ষীৰ হাতত মাত্ৰ ১৬১নং ধাৰাত আফতাবৰ বক্তব্য আছে, যি স্বীকাৰোক্তি তেওঁ যিকোনো সময়তে অস্বীকাৰ কৰিব পাৰে। ঘৰৰ তালাচীৰ সময়ত শ্ৰদ্ধাৰ এডাল চুলিও উদ্ধাৰ হোৱা নাই। এতিয়ালৈকে সংগ্ৰহ কৰা প্ৰমাণ কেৱল পৰিস্থিতিগত প্ৰমাণ হিচাপেহে ব্যৱহাৰ কৰিব পাৰি।

আৰক্ষীৰ জেৰাত আফতাবে গোটেই ১০ ঘণ্টাত শ্ৰদ্ধাৰ মৃতদেহ ৩৫ টুকুৰা কৰি কাটি পেলোৱাৰ কথাও পোহৰলৈ আহিছে। তাৰ পিছত সকলো টুকুৰা অভিযুক্তই পানীৰে ধুই পেলাই। সকলো টুকুৰা পলিথিনত বন্ধ কৰি ফ্ৰীজত ৰাখিছিল। এই সময়ছোৱাত তেওঁ ভাগৰুৱা হ’লেও অনলাইনত খাদ্যৰ অৰ্ডাৰ দিছিল। তাৰ পিছত বিয়েৰ খাই নেটফ্লিক্সত ৱেবছিৰিজ চাই শুই পৰিছিল।

এইদৰেই ধৰা পৰিল আফতাব: আফতাবে আৰম্ভণিৰে পৰা মুম্বাই আৰু দিল্লী আৰক্ষীৰ চকুত ধূলি দিবলৈ চেষ্টা কৰিছিল। আৰক্ষীৰ সন্মুখত কোৱা হৈছিল যে ২২ মে’ত কাজিয়াৰ অন্তত শ্ৰদ্ধা ঘৰৰ পৰা ওলাই গৈছিল। আফতাবে আৰক্ষীক জনাইছিল যে ঘৰৰ পৰা ওলাই যোৱাৰ সময়ত বাকী সকলো বস্তু এৰি থৈ যোৱাৰ সময়ত তাই মাত্ৰ নিজৰ ফোনটো লৈ গৈছিল। ইয়াৰ পিছতো তেওঁ তাইৰ সংস্পৰ্শলৈ নাহিল। আৰক্ষীয়ে আফতাব আৰু শ্ৰদ্ধাৰ কল ৰেকৰ্ড আৰু তেওঁলোকৰ স্থানৰ তদন্ত কৰি বহু সত্য কথা পোহৰলৈ আনে। আটাইতকৈ ডাঙৰ কথাটো পোহৰলৈ আহিছিল যে ২৬ মে’ত শ্ৰদ্ধাৰ নেট বেংকিং একাউণ্ট এপৰ পৰা ৫৪ হাজাৰ টকা আফতাবৰ একাউণ্টলৈ ট্ৰেন্সফাৰ কৰা হৈছিল, আনহাতে আফতাবে পূৰ্বে কৈছিল যে ২২ মে’ৰ পিছত তেওঁ শ্ৰদ্ধাৰ সংস্পৰ্শলৈ অহা নাছিল। ৩১ মে’ত শ্ৰদ্ধাৰ ইনষ্টাগ্ৰাম একাউণ্টত বন্ধুৰ সৈতে আড্ডা মাৰিছিল। আৰক্ষীয়ে শ্ৰদ্ধাৰ ফোনটোৰ লোকেচন উলিয়াওঁতে মেহৰৌলি থানা এলেকা বুলি ধৰা পৰে। ২৬ মে’ত ট্ৰেন্সফাৰ হোৱা ধনৰ স্থানো মেহৰৌলি বুলি প্ৰমাণিত হয়। যেতিয়া আফতাবক আৰক্ষীয়ে জেৰা কৰিছিল, যেতিয়া শ্ৰদ্ধা তাইৰ ফোনটো লৈ ঘৰৰ পৰা ওলাই গৈছিলেই, তেতিয়া কিয় তাইৰ লোকেচন তাৰ ঘৰৰ ওচৰতে ওলাই আছিল, তেতিয়া আফতাবে এই কথাৰ উত্তৰ দিব নোৱাৰিলে আৰু তাৰ পিছত তেওঁ পুলিচক সঁচা কথা ক’লে।