World's Costliest Mango : বিশ্বৰ আটাইতকৈ দামী আম ভাৰতত! দুজোপা গছৰ বাবে ৰাখিছে তিনিজন নিৰাপত্তাৰক্ষী, ৬টা কুকুৰ!

আমৰ বতৰত এতিয়া মিয়াজাকিৰ আভিজাত্য ফলপ্ৰেমীৰ মুখে মুখে। সম্প্ৰতি উদ্যোগপতি হৰ্ষ গোৱেংকাই আটাইতকৈ দামী আমৰ এখন ফটো পোষ্ট কৰিছে। মিয়াজাকি আমৰ জন্ম মূলত জাপানত। ভাৰতত এই ফল খুবেই বিৰল আৰু যিয়ে এই আমৰ খেতি কৰে তেওঁলোকে ব্যাপক নিৰাপত্তাৰ ব্যৱস্থা কৰিবলগীয়া হয়।

‘অদ্ভত ৰুবিৰ ৰঙৰ জাপানী আম মিয়াজাকিক বিশ্বৰ আটাইতকৈ দামী আম বোলা হয়। ইয়াৰ প্ৰতি কিলোৰ দাম ২.৭ লাখ। মধ্য প্ৰদেশৰ জবলপুৰৰ এজন কৃষক পাৰিহাৰে দুজোপা গছৰ নিৰাপত্তাৰ বাবে তিনিজন নিৰাপত্তাৰক্ষী আৰু ৬টা কুকুৰ নিয়োগ কৰিছে।’’ টুইটাৰত লিখিছে আৰপিজি গ্ৰুপৰ অধ্যক্ষ হৰ্ষ গোৱেংকাই। মিয়াজাকি বিশ্বৰ আটাইতকৈ দামী ফলবোৰৰ ভিতৰত এটা। বিগত বছৰত ইয়াৰ দাম উঠিছিল প্ৰতি কিলোগ্ৰামত ২.৭০ লাখ টকা।

সংবাদ প্ৰতিষ্ঠান এএনআইৰ এক প্ৰতিবেদনত কোৱা হৈছে, পাৰিহাৰে ৰে’লত যোৱাৰ সময়ত এজন লোকৰ পৰা মিয়াজাকিৰ পুলি পাইছিল। সেই দম্পতীৰ কোনো ধাৰণা নাছিল যে গছজোপাত গোলাপী ৰঙৰ জাপানী আম লাগিব। মিয়াজাকি আমক প্ৰায়ে ‘এগছ অব ছানছাইন’ বোলা হয় তাৰ আকৃতি আৰু উজ্জ্বল গোলাপী ৰঙৰ বাবে।

জাপানৰ চহৰ মিয়াজাকিত জন্মাৰ বাবেই এই আমৰ নাম মিয়াজাকি। গড়ে এটা আমৰ ওজন ৩৫০ গ্ৰাম। এণ্টিঅক্সিডেণ্ট, বিটা কেৰাটিন আৰু ফলিক এচিডসমৃদ্ধ আমৰ সৰ্বোচ্চ ফলন হয় এপ্ৰিলৰ পৰা আগষ্টলৈ।

মিয়াজাকিত ৭০ৰ দশৰ শেষৰ ফালে আৰু ৮০ৰ দশকৰ আৰম্ভণিতে এই আমৰ উৎপাদন আৰম্ভ হৈছিল। চহৰৰ উষ্ণ জলবায়ু, দীৰ্ঘক্ষণ সূৰ্যৰ পোহৰ আৰু প্ৰচূৰ বৰষুণে মিয়াজাকিৰ কৃষকৰ বাবে এই আমৰ খেতি কৰা সম্ভৱ হৈছে।