দেখাত একেবাৰে সাধাৰণ চেহেৰাৰ এইগৰাকী ছত্তিশগড়ৰ মাও আক্ৰমণৰ মাষ্টাৰমাইণ্ড! জানক কোন এই সুজাতা?

লাইট মেচিনগানৰ পৰা আৰম্ভ কৰি আণ্ডাৰ বেৰেল গ্ৰেণেড লঞ্চাৰ, এটাৰ পিছত আন এটা অত্যাধুনিক অস্ত্ৰ লৈ ছত্তিশগড়ৰ বিজাপুৰত নিৰাপত্তা বাহিনীৰ ওপৰত আক্ৰমণ চলায় ৭০০ মাওবাদীয়ে। এই ভয়ংকৰ আক্ৰমণত অসমৰ দুজন বীৰ সন্তানসহ এইপৰ্যন্ত ২২জন জোৱান ছহীদ হয়। নিৰাপত্তা বাহিনীৰ ওপৰত যে আক্ৰমণ হ’ব পাৰে তাৰ আভাস পোৱা গৈছিল। কিন্তু চাৰিওফালৰ পৰা জোৱানসকলক ঘেৰি মাওবাদীয়ে যি আক্ৰমণ চলালে সেয়া অতি সু পৰিকল্পিত আছিল বুলি চৰ্চা চলিছে। এই আক্ৰমণৰ মাষ্টাৰমাইণ্ড হিচাপে নাম উঠিছে সুজাতা নামৰ মহিলা মাওবাদীগৰাকীৰ।

কোন এই সুজাতা? ৩৪ বছৰ বয়সীয়া সুজাতা বিজপুৰৰ মাওবাদী সংগঠনৰ মূল দায়িত্বত আছে। তেওঁৰ মূৰৰ মূল্য নিৰ্ধাৰণ কৰা হৈছে ৮ লাখ টকা। ইয়াৰ পূৰ্বে বিজাপুৰ পুলিচৰ হাতত সুজাতা গ্ৰেপ্তাৰো হৈছিল। কিন্তু সেই জাল ফালি বাহিৰলৈ ওলায় সুজাতা।

মূলতঃ দক্ষিণ বস্তাৰৰ দণ্ডকাৰণ্যৰ দায়িত্বত আছিল তেওঁ। লাহে লাহে সমগ্ৰ অঞ্চলটোৰে নেতৃত্ব হাতলৈ আনে সুজাতাই। বিজাপুৰত ইয়াৰ পূৰ্বেও একাধিক আক্ৰমণৰ নেপথ্যত আছিল সুজাতা। তেওঁৰ স্বামীও মাওবাদী নেতা আজাদ আলিয়াচ কোয়দা।

শনিবাৰে বিজাপুৰ জিলাত যৌথ তালাচী অভিযান চলায় চিআৰপিএফৰ কোব্ৰা বেটেলিয়ন, ডিষ্ট্ৰিক্ট ৰিজাৰ্ভ গাৰ্ড তথা স্পেচিয়েল টাস্ক ফ’ৰ্চে। অভিযানৰ সময়ত জংঘলৰ ভিতৰত অতৰ্কিতে আক্ৰমণ চলায় মাওবাদীয়ে। শনিবাৰে ২ জনৰ পিছত দেওবাৰে আৰু ২০ জন জোৱানৰ মৃতদেহ উদ্ধাৰ কৰা হয়।

নিৰাপত্তা বিষয়াসকলৰ মতে হাতৰ তলুৱাৰ দৰে সেই ঠাই ভালকৈ পৰিচিত সুজাতা আৰু তেওঁৰ দলৰ। সেয়ে সেই এলেকাত নিৰাপত্তা বাহিনীক ঘেৰি পেলোৱাৰ ষড়যন্ত্ৰ সহজেই কৰিব পাৰে সুজাতাই। অঞ্চলটোত মাওবাদী লুকাই থাকিব পাৰে তাৰ উমান লাভ কৰিয়ে চিআৰপিএফ, এচটিএফ, আৰক্ষীৰ যৌথ বাহিনীয়ে অঞ্চলটোত অভিযান চলায়। কিন্তু জোৱানসকলে আন্দাজ কৰিবই নোৱাৰিলে যে মাওবাদীয়ে আগৰে পৰাই তেওঁলোকৰ কাৰণে জাল পাতি থৈছিল। চিআৰপিএফ বাহিনী সেই অঞ্চলত সুমোৱাৰ লগে লগে তিনি ঠাইৰ পৰা তেওঁলোকক ঘেৰি পেলায় মাওবাদীয়ে। ইয়াৰ পিছতেই এলএমজি, দেশী ৰকেট তথা গ্রেনেডেৰে আক্ৰমণ চলায় তেওঁলোকে। ছহীদ হয় ২২জনকৈ বীৰ জোৱান।