সুখবৰ! কম মূল্যতে কোৰোণাৰ ঔষধ! ভাৰতৰ বজাৰলৈ আনিলে Zydus Cadila-ই

কোৰোণাত আক্ৰান্তৰ বাবে ৰেমডিচিভিৰৰ কম মূল্যৰ জেনেৰিক সংস্কৰণ পালেহি ভাৰত। ঔষধ প্ৰস্তুতকাৰী সংস্থা Zydus Cadilaই ‘‘Gilead Sciences Inc antiviral drug remdesivir’ৰ আটাইতকৈ কম মূল্যৰ জেনেৰিক ভাৰতৰ বজাৰত লঞ্চ কৰে। সংবাদ সংস্থা ৰাইটছত প্ৰকাশ পোৱা মতে, এই ঔষধৰ ১০০ মিবিগ্ৰামৰ দাম হ’ব ভাৰতীয় মূল্যত ২৮০০ টকা।

ইবোলা সংক্ৰমণ প্ৰতিৰোধ কৰিবলৈ ‘Gilead Sciences-এ প্ৰথম ৰেমডিচিভিৰ প্ৰস্তুত কৰিছিল। মাৰ্কিন যুক্তৰাষ্ট্ৰত কোৰোণাৰ অত্যাধিক সংক্ৰমণৰ সময়ত আশাৰ ৰেঙণি দেখুৱাইছিল এই ঔষধে। ভাৰতৰ চিপলা, জুবিল্যাণ্ট লাইফ, হেটেৰো ড্ৰাগছ আৰু মাইলন নামৰ সংস্থাক এই ঔষধৰ ভাৰতীয় সংস্কৰণ তৈয়াৰ কৰিবলৈ অনুমতি দিছে সংস্থাই।

এই ঔষধৰ সক্ৰিয়তা পৰীক্ষা কৰাৰ বাবে কোৰোণা ৰোগীৰ ওপৰত দুটা পৰীক্ষা চলাইছিল জিলিয়ড চাইন্সে। পৰীক্ষাৰ  এটা দলক পাঁচদিন ধৰি ৰেমডিচিভিৰ দিয়া হৈছিল আৰু আনটো দলক দহদিন দিয়া হৈছিল। দেখা যায় যে, কোৰোণাৰ ৰোগীৰ লক্ষ্যণ ১৫ দিনৰ পৰা ১১ দিনলৈ হ্ৰাস কৰিছে ৰেমডিচিভিৰে। 

উল্লেখযোগ্য যে, বিজ্ঞানীয়ে প্ৰথম অৱস্থাৰ পৰাই কৈছিল যে, কোৰোণাৰ প্ৰত্যক্ষ ঔষধ নহয় ৰেমডিচিভিৰ। কিন্তু সংক্ৰমিতৰ শৰীৰত কোৰোণাৰ প্ৰভাৱ হ্ৰাস কৰাত এই ঔষধে ভুমিকা পালন কৰাটো প্ৰমাণিত।

এতিয়া ৰাজধানী দিল্লীৰ লগতে বহু ঠাইত ৰেমডিচিভিৰ ব্যৱহাৰ পৰীক্ষামূলক ভাবে আৰম্ভ কৰা হৈছে।

এই সময়তে ২৮০০ টকাত ১০০ মিলিগ্ৰামৰ ডোজে মধ্যবিত্তৰ মনত আশাৰ সঞ্চাৰ কৰিব।