ডাঙৰ ঘোষণা : ৭৩ দিনৰ ভিতৰত ভাৰতলৈ আহিব কোৰোণাৰ ভেকচিন! সম্পূৰ্ণ বিনামূলীয়া হ’ব টিকাকৰণ

দেশৰ প্ৰথম কোৰোণাৰ ভেকচিনক লৈ ডাঙৰ খবৰ। ভাৰতৰ প্ৰথম কোৰোণাৰ ভেকচিন ‘কোভিছিল্ড’ ৭৩ দিনৰ ভিতৰত উপলব্ধ হ’ব বজাৰত। গুৰুত্বপূৰ্ণ কথাটো হ’ল ৰাষ্ট্রীয় টিকাকৰণ কাৰ্যসূচীৰ অধীনত ভাৰত চৰকাৰে প্ৰতিজন লোককে বিনামূল্যে কোৰোণাৰ ভেকচিন দিব। পুনেৰ বায়’টেক সংস্থা ছেৰাম ইনষ্টিটিউট অব ইণ্ডিয়াই এই ভেকচিন প্ৰস্তুত কৰিছে।

এক সৰ্বভাৰতীয় সংবাদ প্ৰতিষ্ঠানৰ প্ৰতিবেদন অনুসৰি, ভাৰতৰ ছিৰাম ইনষ্টিটিউটৰ কৰ্মকৰ্তাই কৈছে যে ভাৰত চৰকাৰে ছিৰাম ইনষ্টিটিউটক বিশেষ অনুজ্ঞাপত্ৰ দিছে। ইয়াৰ ফলত ভেকচিনৰ পৰীক্ষণ প্ৰটকলৰ প্ৰক্ৰিয়া খুব দ্ৰুতগতিত কৰা সম্ভৱ হ’ব। আশা কৰা হৈছে যে ৫৮ দিনৰ ভিতৰত এই ভেকচিনৰ পৰীক্ষা শেষ হ’ব।

উল্লেখযোগ্য যে ভেকচিনৰ তৃতীয় পৰ্বৰ প্ৰথম ড’জ শনিবাৰ, ২২ আগষ্টত দিয়া হৈছে। দ্বিতীয় ড’জ প্ৰথম ড’জৰ পৰা ২৯ দিন পিছত দিয়া হ’ব পাৰে। ভেকচিনৰ দ্বিতীয় ড’জৰ ১৫ দিনৰ পিছত ৰিপ’ৰ্ট প্ৰকাশ হ’ব। কোভিছিল্ডৰ সকলো পৰীক্ষা হৈ যোৱাৰ পিছতে বজাৰত মুকলি কৰাৰ পৰিকল্পনা লোৱা হৈছে।

কোভিছিল্ড ভেকচিন ১৭টা কেন্দ্ৰত ১৬০০ জনৰ মাজত পৰীক্ষা কৰা হৈছে। প্ৰতিটো কেন্দ্ৰৰ প্ৰায় ১০০জনক কোৰোণাৰ ভেকচিন দিয়াৰ চেষ্টা কৰা হৈছে। এষ্ট্রা জেনিকা নামৰ এটা সংস্থাৰ পৰা এই ভেকচিন প্ৰস্তুতৰ স্বত্ব কিনিছে ছিৰাম ইনষ্টিটিউটে। ইয়াৰ ফলত ভাৰত আৰু ৯২খন দেশত এই কোৰোণাৰ ভেকচিন বিক্ৰী কৰিবলৈ সক্ষম হ’ব ছিৰাম ইনষ্টিটিউট।

কেন্দ্ৰীয় চৰকাৰৰ ফালৰ পৰা ইংগিত পোৱা গৈছে যে চৰকাৰে ছিৰাম ইনষ্টিটিউটৰ পৰা কোভিছিল্ড ভেকচিন কিনিব আৰু প্ৰতিজন ভাৰতীয়ক বিনামূলীয়াকৈ প্ৰদান কৰিব। জানিব পৰা মতে ২০২২ চনৰ জুনৰ ভিতৰত কেন্দ্ৰীয় চৰকাৰে ছিৰাম ইনষ্টিটিউটৰ পৰা ৬৮ কোটি কোৰোণাৰ ভেকচিন কিনিব।

কিন্তু কিদৰে দেশৰ ১৩০ কোটি মানুহৰ বাবে পৰ্যাপ্ত হ’ব ৬৮ কোটি ভেকচিন? জনা গৈছে যে ইয়াক লৈ চৰকাৰৰ পৃথক পৰিকল্পনা আছে। ছিৰাম ইনষ্টিটিউটৰ উপৰি আইচিএমআৰ আৰু ভাৰত বায়’টেক উদ্যোগত প্ৰস্তুত কোভেকচিন আৰু জাইকোভি–ডিৰ ওপৰত নিৰ্ভৰ কৰা হ’ব।

ছিৰাম ইনষ্টিটিউটৰ পৰিকল্পনা অনুযায়ী, যদি সময়মতে পৰীক্ষা শেষ হয়, তেন্তে প্ৰতিমাহে ৬ কোটি কোৰোণাৰ ভেকচিন প্ৰস্তুত কৰিব। যিটো ২০২১ৰ এপ্ৰিলৰ ভিতৰত বৃদ্ধি হৈ ১০ কোটি কৰা হ’ব।