Change Language
Download App
বিগত প্ৰায় দুমাহ ধৰি কোৰোণাৰ দ্বিতীয় ঢৌত বিপৰ্যস্ত দেশ। প্ৰতিদিনে লাখ লাখ কোৰোণা আক্ৰান্ত আৰু হাজাৰ হাজাৰ লোকৰ মৃত্যু হৈছে। ফলত স্বাস্থ্য আন্তঃগাঁথনি একেবাৰে ভাঙি পৰিছিল। কিন্তু লাহে লাহে কিছু স্বস্তিৰ খবৰ আহিছে।
বিগত ৩ সপ্তাহ ধৰি প্ৰতিদিনে কোৰোণাত নতুনকৈ আক্ৰান্তৰ সংখ্যা বহু পৰিমাণে হ্ৰাস পাইছে। ৭ দিনৰ গড় হিচাপত দেশত কোৰোণাত আক্ৰান্তৰ সংখ্যা ৫০ শতাংশ কমিছে।
দেশত দ্বিতীয় ঢৌত কোৰোণাত আক্ৰান্তৰ সৰ্বাধিক সংখ্যা আছিল ৮ মে’। সেইদিনা ৩ লাখ ৯১ হাজাৰ ২৬৩জন লোক কোৰোণাত আক্ৰান্ত হৈছিল। কিন্তু শনিবাৰে অৰ্থাৎ ২৯মে’ত নতুনকৈ আক্ৰান্তৰ সংখ্যা ১,৯৫,৮৩জন। যিটো ৫০ শতাংশ কম।
কোৰোণাৰ প্ৰথম আৰু দ্বিতীয় পৰ্যায়ৰ যদি তুলনা কৰা হয়, তেন্তে এইবাৰ ৩ সপ্তাহৰ ভিতৰত ৫০ শতাংশ হ্ৰাস পাইছে, য’ত বিগত বৰ্ষত সৰ্বাধিক সংখ্যাৰ পৰা ৫০ শতাংশলৈ হ্ৰাস পাবলৈ সময় লাগিছিল প্ৰায় ৬ সপ্তাহ।
একেদৰে মৃত্যুৰ সংখ্যাও কিছু পৰিমাণে হ্ৰাস পাইছে। বিগত ৭ দিনৰ মৃত্যুৰ গড় সংখ্যালৈ চালে বুজা যায় যে প্ৰায় ১৮ শতাংশ হ্ৰাস পাইছে। ১৮ মে’ত ৪,০৪০জন লোকৰ মৃত্যু হৈছিল। বৰ্তমান গড় মৃত্যুৰ সংখ্যা ৩,৩৪৪। তথাপি কোৰোণাত মৃত্যুৰ সংখ্যাক লৈ উদ্বিগ্নতা এতিয়াও আছে। বৰ্তমানো মৃতকৰ সংখ্যা ৩ হাজাৰৰ তললৈ নমা নাই। শনিবাৰে ৩,০৮০জন ৰোগীৰ মৃত্যু হয়।
