Royal Trains of India| ভিতৰত সোমালেই ৰাজকীয় অনুভৱ, ভাৰতৰ এই পাঁচখন ৰে’লৰ তুলনা পৃথিৱীতে নাই

এবাৰ ভৰি থলেই খৰচ হয় লক্ষাধিক টকা। এনে ৰাজকীয় প্ৰমোদ ভ্ৰমণ ভাৰততে সম্ভৱ। চাৰি–পাঁচখন এনে ৰে’ল আছে য’ত যাত্ৰা কৰিলে আপুনি লাভ কৰিব স্বৰ্গসুখ! আপোনাক প্ৰদান কৰিব ৰাজকীয় অনুভূতি। ৰাজকীয় খাদ্য সম্ভাৰৰ পৰা আৰম্ভ কৰি মখমলী বিচনাত শুই ভাৰতৰ জনপ্ৰিয় স্থানসমূহ চোৱাটো কিদৰে সম্ভৱ, চাওক ফটোত।

পেলেচ অন হুইলছ : ১৩টা ডবাৰ এই ৰে’লখনত ৩৯টা কেবিন আছে। এই কেবিনসমূহক ছেলুন বোলা হয়। অত্যন্ত সুন্দৰ এই ৰে’লখনে যাত্ৰা আৰম্ভ কৰে জয়পুৰৰ পৰা। এই ৰে’লখনত উঠি যাব পৰা যায় চিতোৰগড়, জেইছলমেৰ, যোধপুৰ, ভৰতপুৰ, আগ্ৰালৈ। এই ৰে’লত উঠিবলৈ সৰ্বনিম্ন খৰচ হয় ৩ লাখ ৬৩ হাজাৰ টকা।

ৰয়েল ৰাজস্থান অন হুইলছ : ৰাজস্থানৰ ৰাজপুত মেজাজৰ পৰশ পাবলৈ উঠিব লাগিব এই ৰে’লখনত। দিল্লীৰ পৰা উঠি চাব পাৰিব ৰাজপুতানা প্ৰদেশৰ সমগ্ৰ অঞ্চলসমূহ। এই ৰে’লখনত ১৬টা ডবা আৰু দুটা ছুপাৰ ডিলাক্স ছেলুন আছে। প্ৰতিটো ডবাৰ নাম হৈছে ৰাজস্থানৰ বিভিন্ন প্ৰাসাদৰ নাম অনুসৰি। যেনে ফুল মহল, পদ্মিনী মহল। ৰে’লতে স্পা সেৱা পোৱা যায় ইয়াত। এই ৰে’লত যাত্ৰা কৰিবলৈ খৰচ হয় ৩ লাখ ৭৮ হাজাৰ টকা।

২০১৩ চনৰ পৰা গ’ল্ডেন চেৰিয়ট নামৰ ৰে’লখন চলাই আছে কৰ্ণাটক ষ্টেট ট্যুৰিজিম ডেভেলপমেণ্ট কৰ্প’ৰেচনে। এই ৰে’লখনে যাত্ৰা আৰম্ভ কৰে বেংগালুৰুৰ পৰা। ৰে’লখনত ১১টা ডিলাক্স কেবিন আছে। আছে ৰাজকীয় খোৱা–বোৱাৰ ব্যৱস্থা। এটা নিশা এই ৰে’লখনত কটাবলৈ খৰচ হয় ১ লাখ ৬ হাজাৰ ৭০০ টকা।

অন্যতম ব্যয়বহুল ৰে’ল মহাৰাজা এক্সপ্ৰেছত ২৩টা বিশাল কোঠা আছে। ২০১০ চনৰ পৰা চলি আছে এই ৰে’লখন। ৪ দিনৰ পেকেট ট্যুৰত এই ৰে’লখনে যাত্ৰীসকলক তাজমহল, খাজুৰাহো, ৰনথম্বোৰ, ফতেপুৰ, ছিক্ৰি, বাৰাণসী আদি ঘূৰাব। খৰচ হ’ব ৩ লক্ষাধিক।

ডেকান ওডিচি ৰে’লখনো অতি জনপ্ৰিয়। এই ৰে’লখন কেইটামান ৰুটত চলে। ইয়াৰ ভিতৰত আটাইতকৈ প্ৰচলিত পথটো হ’ল মুম্বাইৰ পৰা অজন্তা ইলোৰা , কোলাপুৰ, গোৱা, ৰত্নাগিৰি হৈ আকৌ মুম্বাই। ৰে’লখনত যাত্ৰা কৰিবলৈ খৰচ হয় ৪ লাখ টকা।