মদ খাবলৈ দিয়া নাছিল বেছিকৈ টকা! বিয়াৰ দিনাই দৰাক গুৰুলা গুৰুলকৈ প্ৰহাৰ কৰি হত্যা কৰিলে একাংশ বন্ধুৱে

এয়া কেনেকুৱা বন্ধুত্ব? বন্ধুৰ নামত কলংক নেকি? মৰ্মান্তিক ঘটনাটো সংঘটিত হোৱাৰ পিছতে উত্থাপিত হৈছে বহু প্ৰশ্নৰ। বিয়াৰ দিনাই একাংশ উত্তেজিত বন্ধুৱে হত্যা কৰিলে দৰাক। অপৰাধ হ’ল, মদ খাবলৈ দিয়া নাছিল বেছিকৈ টকা।

যোৱা সোমবাৰে উত্তৰপ্ৰদেশৰ পালিমুকিমত সংঘটিত হৈছিল এই ঘটনা। ২৮ বছৰীয়া বাবলু নামৰ এজন যুৱকে বিয়া কৰাবলৈ গৈছিল গাঁৱখনলৈ। লগত গৈছিল তেওঁৰ কেইজনমান বন্ধু। বিয়া উপলক্ষে বন্ধুয়ে নিচা কৰিবলৈ টকা বিচাৰিছিল বাব্লুৰ পৰা। কিন্তু বন্ধুৱে দাবী কৰা পৰিমাণৰ টকা দিয়া নাছিল দৰা বাব্লুৱে। যাৰ ফলত অসন্তুষ্ট হৈ পৰে একাংশ বন্ধু।

আৰু পিছতে বেয়াকৈ প্ৰহাৰ কৰে বাব্লুক।

আনকি বিবাহ কাৰ্য সম্পন্ন হোৱাৰ পিছতো বিবাহগৃহৰ পৰা জোৰকৈ বাব্লুক লৈ যায় একাংশ বন্ধুৱে। আৰু চোকা অস্ত্ৰৰে আঘাত কৰে। পিছত একাংশ লোকে বাব্লুক ঘটনাস্থলীৰ পৰা উদ্ধাৰ কৰি হাস্পতাললৈ লৈ যায় যদিও, হাস্পতালতে মৃত্যুক আঁকোৱালি লয়।

ঘটনাৰ সন্দৰ্ভত ইতিমধ্যে এজন বন্ধুক গ্ৰেপ্তাৰ কৰিছে আৰক্ষীয়ে। বাকী পাঁচজন অভিযুক্ত এতিয়াও পলাতক।