উজ্জ্বলা যোজনাত এনেদৰে কৰক নাম পঞ্জীয়ন, আৰু বিনামূলীয়াকৈ লাভ কৰক গেছ চিলিণ্ডাৰ

কোৰোণাৰ সংকটৰ ফলত দেশৰ দৰিদ্ৰ পৰিয়াললৈ বিনামূলীয়া চিলিণ্ডাৰ যোগান ধৰা আঁচনি আৰু তিনি মাহ বঢ়াই দিয়াৰ সিদ্ধান্ত লৈছে কেন্দ্ৰীয় চৰকাৰে। প্ৰধানমন্ত্ৰী উজ্জ্বলা যোজনাৰ অধীনত যি এতিয়ালৈকে তৃতীয়টো চিলিণ্ডাৰ লাভ কৰা নাই, তেওঁ ছেপ্তেম্বৰ পৰ্যন্ত বিনামূলীয়াকৈ লাভ কৰিব। এই সুবিধা লাভ কৰিবলৈ কৰিব লাগিব নাম পঞ্জীয়ন।

উজ্জ্বলা যোজনাত নাম ৰেজিষ্ট্ৰেশ্যন কৰা অতি সহজ। দৰিদ্ৰ সীমা ৰেখাৰ তলৰ পৰিয়ালৰ যিকোনো মহিলাই গেছ চিলিণ্ডাৰৰ বাবে আবেদন কৰিব পাৰে। pmujjwalayojana.com ৱেবচেইটাত ইয়াৰ সৱিশেষ তথ্য জানিব পাৰিব।

প্ৰধানমন্ত্ৰী উজ্জ্বলা যোজনাৰ বাবে আবেদন পত্ৰত নিকটৱৰ্তী ডিষ্ট্ৰিবিউশ্যন চেণ্টাৰৰ নাম উল্লেখ কৰিব লাগিব। আবেদন পত্ৰত মহিলাৰ সম্পূৰ্ণ নাম, ঠিকনা, জনধন বেংক একাউণ্ট আৰু পৰিয়ালৰ সকলো সদস্যৰ আধাৰ নম্বৰ দিব লাগিব।

উজ্জ্বলা যোজনাৰ এল পি জি কানেকশ্যন লাভৰ বাবে ষ্টোভ সহ মুঠ ৩২০০ টকা দিব লাগে। ইয়াৰে ১৬০০ টকা চৰকাৰৰ ফালৰ পৰা দিয়া হয় আৰু বাকী ১৬০০ টকা তেল সংস্থাই দিয়ে। কিন্তু গ্ৰাহকে ই এম আই হিচাপত ১৬০০ টকা তেল সংস্থাক দিব লাগিব।