Holi 2021 in Pandemic: বাঢ়িছে কোৰোণাৰ সংক্ৰমণ, হোলী খেলাত নিষেধাজ্ঞা আৰোপ! জানি লওক সবিশেষ

আকৌ উদ্বেগজনক ভাবে বাঢ়িছে কোৰোণাৰ সংক্ৰমণ। দেশৰ বহুকেইখন ৰাজ্যত ভয়ংকৰ ভাবে বাঢ়িছে সংক্ৰমণৰ ঘটনা। গতিকে এই ক্ষেত্ৰত এতিয়া অধিক সাৱধান হৈছে প্ৰশাসন।  কোৰোণাৰ শেহতীয়া সংক্ৰমণৰ প্ৰতি লক্ষ্য ৰাখি দিল্লী, উত্তৰপ্ৰদেশ, বিহাৰ , মধ্যপ্ৰদেশ সহ কেইবাখনো ৰাজ্যত হোলী উদযাপনৰ ক্ষেত্ৰত বহু বাধা নিষেধ আৰোপ কৰা হৈছে।

কোৰোণাৰ সংক্ৰমণ চলিত বৰ্ষৰ মাৰ্চ মাহৰ পৰা পুনৰ বাঢ়িবলৈ আৰম্ভ কৰিছে। ভকচিনেশ্যনৰ কাম চলি থকাৰ মাজতে আকৌ সংক্ৰমণ বাঢ়ি অহাত চিন্তাত পৰিছে কেন্দ্ৰীয় চৰকাৰ।

কোৰোণাৰ এই সংকটকালত উত্তৰ প্ৰদেশৰ যোগী চৰকাৰে হোলী সম্পৰ্কত কিছু নিৰ্দেশনা জাৰি কৰিছে।উত্তৰ প্ৰদেশ চৰকাৰে জ্যেষ্ঠ নাগৰিকৰ লগতে ৰোগীয়া লোকক হোলী খেলাৰ পৰা বিৰত থাকিবলৈ নিৰ্দেশ দিছে। আনহাতে কোনো লোকে হোলীৰ অনুষ্ঠানত আয়োজনৰ ক্ষেত্ৰতো চৰকাৰৰ পৰা আগতীয়া অনুমতি ল'ব লাগিব।

ঠিক সেইদৰে মধ্যপ্ৰদেশ চৰকাৰ আৰু বিহাৰৰ নিতীশ কুমাৰৰ চৰকাৰেও উৎসৱ উদযাপনৰ ক্ষেত্ৰত নীতি-নিৰ্দেশনা জাৰি কৰিছে। ৰাজ্য চৰকাৰৰ মতে, হোলীত এইবাৰ কোনো মেলাৰ আয়োজন কৰিব নোৱাৰিব।  কোনো অনুষ্ঠানত ২০ জনতকৈ অধিক লোক যাব নোৱাৰিব।

কোৰোণাই আটাইতকৈ বেছি ক্ষতি কৰিছে মহাৰাষ্ট্ৰক। মুম্বাইৰ পৌৰসভাৰ অন্তৰ্গত চহৰত হোলি উদযাপনত নিষেধাজ্ঞা আৰোপ কৰা হৈছে। আনহাতে পৰম্পৰাগত নীতি-নিয়ম খিনি ঘৰৰ ভিতৰতে পালন  কৰিব লাগিব। একেদৰে চণ্ডীগড়তো নিষিদ্ধ কৰা হৈছে হোলী উদযাপন।