সংক্ৰমণৰ উৰ্ধ্ব গতি দিল্লীত। অভাৱ ঘটিছে অক্সিজেনৰ। কোৰোণাৰ ছুনামীত বিধ্বস্ত দিল্লী এতিয়া কাৰ্যত মৃত্যুপুৰী ! ২৪ ঘণ্টাই জ্বলিছে ৰোগীৰ চিতা। যোৱা এসপ্তাহ ধৰি মৃত্যুৰ মিছিল ৰাজধানী দিল্লীত। প্ৰতিঘণ্টাত মৃত্যু ঘটিছে ১২জনকৈ ৰোগীৰ। যিসংখ্যা যোৱা সপ্তাহত আছিল ৫। সোমবাৰৰ পৰা শনিবাৰৰ ভিতৰত (১৯-২৪ এপ্রিল) দিল্লীত ১,৭৭৭ কোৰোণাত আক্ৰান্ত ৰোগীৰ মৃত্যু হৈছে। দিল্লী প্ৰশাসনৰ হিচাপ অনুসৰি, ঘণ্টাত ১২ জন কোৰোণাত আক্ৰান্ত ৰোগীয়ে মৃত্যুবৰণ কৰিছে। ঠিক তাৰ আগৰ সপ্তাহত সোমবাৰৰ পৰা শনিবাৰৰ (১২-১৭ এপ্রিল) ভিতৰত ৰাজধানী দিল্লীত কোৰোণাত আক্ৰান্ত হৈ মৃত্যু হৈছিল ৬৬৭ জন ৰোগীৰ। প্ৰতি ঘণ্টাত মৃত্যু হৈছিল ৫ জনকৈ ৰোগীৰ। চলিত সপ্তাহৰ সোমবাৰে ২৪০ জন কোৰোণাত আক্ৰান্তৰ মৃত্যু হৈছে। মঙলবাৰে ২৭৭, বুধবাৰে ২৪৯, বৃহস্পতিবাৰে ৩০৪, শুকুৰবাৰে ৩৪৮ জন ৰোগীৰ মৃত্যু হৈছে। হিচাপ কৰিলে দিনে ১৫ জনকৈ কোৰোণাত আক্ৰান্তই মৃত্যুবৰণ কৰিছে। শনিবাৰে এই সংখ্যাই স্পৰ্শ কৰে ৩৫৭। প্ৰশাসনৰ পৰিসংখ্যা অনুসৰি, সোমবাৰ পৰ্যন্ত দিল্লীত কোৰোণাত আক্ৰান্তৰ সংখ্যা ১ লাখ ৫১ হাজাৰ। ঘণ্টাত আক্ৰান্ত হৈছে ১,০৫১ জন। বৃহস্পতিবাৰে সকলো ৰেকৰ্ড ভংগ কৰি ৰাজধানী দিল্লীত কোৰোণাত আক্ৰান্ত হৈছিল ২৮,৩৯৫ জন। ফলত একেবাৰতে প্ৰতিঘণ্টাত আক্ৰান্তৰ সংখ্যা বাঢ়ি গৈছিল ১,১৮৩লৈ।
