CM Himanta Biswa Sarma : ৰাজ্যৰ বিভাজনৰ ক্ষেত্ৰত বিজেপিয়ে কেতিয়াও আপোচ নকৰে, ত্ৰিপুৰাত মুখ্যমন্ত্ৰী ড০ হিমন্ত বিশ্ব শৰ্মাৰ নিৰ্বাচনী প্ৰচাৰ

বিজেপি ত্ৰিপুৰাৰ প্ৰাৰ্থী শ্ৰীমতী মালিনা দেৱনাথৰ বাবে ত্ৰিপুৰাৰ জুবৰাজ নগৰত অনুষ্ঠিত নিৰ্বাচনী সভাত নাগৰিকৰ সৈতে মত বিনিময় কৰে মুখ্যমন্ত্ৰীয়ে।

ৰাজ্যখনৰ দ্ৰুত উন্নয়ন আৰু অগ্ৰগতি অব্যাহত ৰখাৰ বাবে সকলোকে আহ্বান জনাই তেওঁ বিজেপি প্ৰাৰ্থীৰ সমৰ্থনত ভোটদান কৰাৰ বাবে আহ্বান জনায়।

ত্ৰিপুৰাত এইবাৰ বিজেপিয়ে নিৰংকুশ সংখ্যাগৰিষ্ঠতাৰে জয়লাভ কৰিব বুলিও মুখ্যমন্ত্ৰীয়ে প্ৰকাশ কৰে। মুখ্যমন্ত্ৰী ড০ হিমন্ত বিশ্ব শৰ্মাৰ ভাষণ শুনিবলৈ বহু মানুহৰ সমাগম হোৱা দেখা গৈছিল।

ত্ৰিপুৰাত বৃহত্তৰ তিপ্ৰালেণ্ডৰ দাবী উত্থাপন কৰা প্ৰদ্যুৎ দেৱবৰ্মাৰ সৈতে তেওঁৰ দুখন বৈঠক হোৱাৰ কথা প্ৰকাশ কৰি কয় যে বিজেপি ত্ৰিপুৰা বিভাজনৰ সম্পূৰ্ণ বিৰোধী। লগতে তেওঁ কয়- "তেওঁৰ ককাকে (ত্ৰিপুৰা ৰাজ্যৰ প্ৰাক্তন শাসক বীৰ বিক্ৰম মাণিক্য) বৃহত্তৰ তিপ্ৰালেণ্ডৰ দাবী কৰা নাছিল, এতিয়া কিয় এই দাবী কৰা হৈছে?"

"বিজেপি খিলঞ্জীয়া জনসাধাৰণৰ সবলীকৰণৰ বাবে সকলো দিবলৈ সাজু -- সামাজিক, সাংস্কৃতিক, ৰাজনৈতিক আৰু ভাষিকভাৱে, কিন্তু ত্ৰিপুৰাৰ বিভাজনৰ বিৰোধী। বিজেপিয়ে ভোট হেৰুৱালেও ত্ৰিপুৰাৰ ভূখণ্ডীয় অখণ্ডতাৰ সৈতে আপোচ নকৰে।"- কয় মুখ্যমন্ত্ৰীয়ে