দাদৰী চহৰৰ এগৰাকী বিবাহিতা মহিলাক স্বামী আৰু দেওৰেকে মিলি বগৰাই বগৰাই লাঠীৰে মাৰধৰ কৰে। বাইকত অহা দুই ভাতৃয়ে ৰাজপথতে মহিলাগৰাকীক কৰে আক্ৰমণ। মহিলাগৰাকীয়ে সহায়ৰ বাবে বিচাৰিলে হাত কিন্তু পথচাৰী নিৰৱ হৈ চাই থাকিল এই নৃশংসতা। মহিলাগৰাকীক মাৰধৰ কৰাৰ পিছতে ঘটনাস্থলীৰপৰা পলায়ন কৰে ভাতৃদ্বয়ে।
ঘটনাৰ সম্পূৰ্ণ ভিডিঅ’ CCTVত বন্দী হ’ল আৰু ছচিয়েল মিডিয়াতো ভাইৰেল হৈ পৰিল। আহত মহিলাগৰাকীক চিকিৎসাৰ বাবে ৰৌহটক PGIত ভৰ্তি কৰোৱা হয় যদিও স্বাস্থ্য অৱনতি ঘটাত ৰাজস্থানলৈ প্ৰেৰণ কৰা হয়।
আৰক্ষীয়ে ঘটনা সন্দৰ্ভত মহিলাগৰাকীৰ অভিযোগত গোচৰ ৰুজু কৰে। ছচিয়েল মিডিয়াত ভিডিঅ’ ভাইৰেল হোৱাৰ পিছতে আৰক্ষীয়ে গ্ৰেপ্তাৰ কৰে ভাতৃদ্বয়ক আৰু জেললৈ প্ৰেৰণ কৰে। ইফালে ভুক্তভোগী মহিলাগৰাকীৰ শাহু–শহুৰ যথেষ্ট শংকাত আছে।
হংসাবাছৰ নিবাসী সুমন দেৱী চৰখী নিবাসী সুনীলৰ সৈতে বিবাহপাশত আবদ্ধ হৈছিল। বিবাহৰ পিছত পাৰিবাৰিক কন্দলৰ বাবে সুমনে শাহু–শহুৰৰ সৈতে দাদৰী চহৰত বাস কৰিছিল। পুত্ৰৰ পৰা পোৱা অশান্তিৰ বাবে সুমনৰ শহুৰে নিজৰ সকলো সম্পত্তি নাতিনীয়েকৰ নামত লিখি দিয়ে, ইয়াৰ পিছতে দুয়ো পক্ষৰ মাজত আৰম্ভ হৈছিল কন্দল।
