Anant Radhika Wedding : অনন্ত–ৰাধিকাৰ এংগেজমেণ্ট, আম্বানী পৰিয়ালৰ বোৱাৰী হ’ব ৰাধিকা মাৰ্চেণ্ট

এংগেজমেণ্ট পৰ্ব সম্পন্ন হ’ল অনন্ত আম্বানী আৰু ৰাধিকা মাৰ্চেণ্টৰ। ৰাজস্থানৰ শ্ৰীনাথজী মন্দিৰত এক হ’ল দুই পৰিয়াল। মাৰ্চেণ্ট আৰু আম্বানী পৰিয়ালৰ শুভ অনুষ্ঠানত সম্পন্ন হয় বৃহস্পতিবাৰে। ৰিলায়েঞ্চ ইণ্ডাষ্ট্ৰীজ লিমিটেডৰ অধ্যক্ষ আৰু মেনেজিং ডিৰেক্টৰ মুকেশ আম্বানী আৰু নীতা আম্বানীৰ কনিষ্ঠ পুত্ৰ অনন্ত আৰু ব্যৱসায়ী বীৰেন মাৰ্চেণ্ট আৰু শৈলা মাৰ্চেণ্টৰ ডাঙৰ কন্যা ৰাধিকাৰ বাগদান পৰ্ব সুকলমে অনুষ্ঠিত হৈ যায়।

দুই পৰিয়ালক বহুদিন ধৰি বিভিন্ন অনুষ্ঠানত একেলগে দেখা গৈছিল। বিগত জুন মাহত মুকেশ আম্বানী আৰু নীতা আম্বানীয়ে তেওঁলোকৰ হ’বলগীয়া বোৱাৰীৰ নৃত্যৰ অনুষ্ঠানৰ আয়োজন কৰিছিল ‘জিঅ’ ৱৰ্ল্ড চেণ্টাৰত। তাত প্ৰথমবাৰলৈ ৰাধিকা মাৰ্চেণ্টে ভাৰতনাট্যম নৃত্যৰ প্ৰতিভা মঞ্চত তুলি ধৰিছিল।

প্ৰথমবাৰ তেওঁ ইমান ডাঙৰ মঞ্চত ভাৰতনাট্যম পৰিৱেশন কৰিছিল। এই অনুষ্ঠানটোৱে ৰাধিকা আৰু তেওঁ গুৰু ভাৱনা ঠাকৰেৰ সফলতা চিহ্নিত কৰিছিল। যিয়ে ৰাধিকাক ৮ বছৰৰো অধিক সময় ধৰি ভাৰতনাট্যমৰ প্ৰশিক্ষণ দিছিল। জুন মাহত শিষ্যৰ ‘অৰঙ্গেত্ৰম’ অনুষ্ঠিত হ’ল। ইয়াৰ জৰিয়তে ৰাধিকাই এক নতুন জগতত ভৰি দিলে।

গুৰু ভাৱনা ঠাকৰেৰ ওচৰত নৃত্যৰ প্ৰশিক্ষণ লৈছে ২৭ বছৰীয়া ৰাধিকাই। ভাৱনা ঠাকৰেৰ শ্ৰীনিবাস আৰ্টছৰ ছাত্ৰী তেওঁ। বহু বছৰ ধৰি নৃত্য শিকাৰ পিছত প্ৰথমবাৰ নিজৰ অনুষ্ঠানত নৃত্য কৰে এই প্ৰতিষ্ঠানৰ ছাত্ৰ–ছাত্ৰীসকলে। তাকে কোৱা হয় ‘আৰঙ্গেত্ৰম’। উল্লেখযোগ্য যে নীতা আম্বানীও ভাৰতনাট্যম প্ৰশিক্ষিত।

মুম্বাইৰ জিঅ’ ৱৰ্ল্ড চেণ্টাৰৰ ‘দ্য গ্ৰেণ্ড থিয়েটাৰ’ত সেইদিনা উপস্থিত আছিল ডাঙৰ ডাঙৰ তাৰকা। অনিল আম্বানী, টিনা আম্বানী, অনন্ত আম্বানীৰ জ্যেষ্ঠ ভাতৃ আকাশ আম্বানী আৰু তেওঁৰ পত্নী শ্লোকা মেহতাই ভাৰতীয় পোছাকত উপস্থিত আছিল ৰাধিকাৰ অনুষ্ঠানত।

উপস্থিত আছিল বলীউদৰ তাৰকাও। ছলমান খান, আমিৰ খান, ৰণবীৰ সিং। তাৰ উপৰি প্ৰাক্তন ক্ৰিকেটাৰ জাহিৰ খান আৰু তেওঁৰ পত্নী সাগৰিকা ঘাটগেও ৰাধিকাৰ নৃত্য উপভোগ কৰিবলৈ গৈছিল।

এইবাৰ সেই দুয়োটা পৰিয়াল এক হোৱাৰ দিশে খোজ দিলে। অনন্ত আৰু ৰাধিকা, দুয়োৰে সুখী দাম্পত্য জীৱনৰ বাবে শ্ৰীনাথজী মন্দিৰত আত্মীয় আৰু বন্ধুবৰ্গই প্ৰাৰ্থনা কৰে। সেই মন্দিৰত ঐতিহ্যবাহী ৰাজ–ভোগ–শৃংগাৰ অনুষ্ঠানত অংশগ্ৰহণ কৰে দুয়ো পৰিয়ালে। আম্বানী আৰু মাৰ্চেণ্ট পৰিয়ালৰ সকলোৱে আনন্দ উপভোগ কৰে।