Amazing : মধ্যপ্ৰদেশৰ এখন গাঁও, যি বিখ্যাত হৈ পৰিছে ৰাষ্ট্ৰীয় পক্ষী ময়ূৰৰ বাবে, ইয়াৰ বাবে কি কৰিছে গাঁওবাসীয়ে?

উজ্জয়িনীৰ পৰা মাত্ৰ সাত কিলোমিটাৰ দূৰত চিন্তামান ৰোডৰ কাষৰীয়া মংগৰোলা নামৰ এখন গাঁও। এখন সাধাৰণ গ্ৰাম্য অঞ্চলৰ দৰে গাঁও। কিন্তু এই গাঁওখন আজি বিখ্যাত ভাৰতৰ ৰাষ্ট্ৰীয় চৰাই ময়ূৰৰ বাবে। কিয়নো এই গাঁওখনৰ বাসিন্দাই লালন–পালন কৰিছে ময়ূৰ। প্ৰায় ৬০০ তকৈও অধিক ময়ূৰ আছে গাঁওখনত।

মংগৰোলা গাঁওৰ জনসংখ্যা এহাজাৰ আৰু তেওঁলোকৰ সৈতে আছে ৬০০টা ময়ূৰ। ময়ূৰৰ বাবে নিশাৰ আশ্ৰয়স্থল হৈ পৰা মংগৰোলা গাঁওখনত ময়ূৰ সংৰক্ষণৰ প্ৰচেষ্টাও এতিয়া গঢ়ি উঠিছে।

ময়ূৰবোৰ বচাবলৈ গাঁওবাসীয়ে প্ৰথমে ধন সংগ্ৰহ কৰিছিল আৰু তাৰ পিছত এটা ময়ূৰ সংৰক্ষণ কেন্দ্ৰ নিৰ্মাণ কৰিছিল। ইয়াত ময়ূৰৰ বাবে বাসস্থান আৰু চিকিৎসা প্ৰদান কৰিছিল৷ উচ্চ শিক্ষা মন্ত্ৰী মোহন যাদৱেও ময়ূৰ সংৰক্ষণৰ বাবে এমএলএ ফাণ্ডৰ পৰা ৫ লাখ টকা দিছিল৷ এতিয়া গাঁওখনৰ চৰকাৰী ভূমিত এটা ময়ূৰ সংৰক্ষণ কেন্দ্ৰ আৰম্ভ কৰা হৈছে।

সাধাৰণতে লাজকুৰীয়া আৰু ভীৰু প্ৰকৃতিৰ ময়ূৰ এতিয়া এই গাঁওখনৰ অংশ হৈ পৰিছে। ঘৰৰ পোহনীয়া জন্তু কুকুৰ–মেকুৰীৰ দৰে পোহ মানিছে ময়ূৰেও। ঘৰে ঘৰে ঘূৰি ফুৰা দেখা যায় ইয়াক। মংগৰোলা গাঁওৰ কাষৰীয়া প্ৰায় ১৫খন গাঁৱতো ইয়াৰ জনসংখ্যা লাহে লাহে বাঢ়ি আহিছে।

দৰাচলতে এয়া হৈছে গাঁওখনৰ যুৱক-যুৱতীসকলৰ প্ৰচেষ্টা। তেওঁলোকে ময়ূৰবোৰ ৰক্ষা কৰাৰ দায়িত্ব লৈছে। এইক্ষেত্ৰত বহু কষ্ট স্বীকাৰ কৰিছে গাঁৱৰ যুৱ সমাজে। কিয়নো কেতিয়াবা ময়ূৰে পথাৰত পোক-পতংগ খোৱাৰ সময়ত কীটনাশক খায় আৰু আন বনৰীয়া জন্তুৱেও ময়ূৰক আক্ৰমণ কৰে।

গাঁওখনত ময়ূৰৰ সংখ্যা বৃদ্ধি হোৱাৰ লগে লগে জিলা প্ৰশাসনে সংৰক্ষণ কেন্দ্ৰৰ বাবে ১০ বিঘা মাটি দান দিছিল। এইটো অঞ্চলটোৰ প্ৰথম আৰু একমাত্ৰ ময়ূৰ সংৰক্ষণ কেন্দ্ৰ। ঠাণ্ডা আৰু বৰষুণৰ সময়ত পথাৰলৈ যোৱা ময়ূৰবোৰ গৰমৰ সময়ত ঘৰত থাকে। ময়ূৰবোৰ গাঁওবাসীৰ ইমানেই বন্ধু হৈ পৰিছে যে ঘৰৰ বাগিচাতো কণী পাৰে।