পুনৰ সীমান্তত চীনৰ উচতনি! দ্বিপাক্ষিক বুজাবুজি চীনে মানি নচলাৰ কাৰণে উপযুক্ত ব্যৱস্থা ল’বলৈ কেন্দ্ৰৰ তৎপৰতা

পেংগং লেকৰ স্থিতাৱস্থা নিজাববীয়াকৈ নষ্ট কৰি আকৌ এবাৰ দুই দেশৰ সম্পর্কৰ ওপৰত নেতিবাচক প্ৰভাৱ পেলোৱাৰ চেষ্টা কৰিছে চীনে। ইয়াৰ পূৰ্বে গালোৱান উপত্যকাত চীনা সেনাৰ হঠাৎ আক্রমণত প্রাণ গৈছিল ২০জন ভাৰতীয় সেনাৰ৷ সেই তেতিয়াৰ পৰাই দুয়োখন দেশৰ মাজত আৰম্ভ হয় কঠিন সময়।

দুই দেশৰ সম্পর্ক উন্নত কৰিবলৈ কথা–বতৰা চলিছিল। ইয়াৰ মাজতে সমগ্ৰ কূটনৈতিক তথা সামৰিক বুজাপৰা লংঘন কৰি আকৌ এবাৰ আগষ্টৰ ২৯–৩০তাৰিখে সীমান্তত অশান্তিৰ পৰিৱেশ সৃষ্টি কৰে চীনে। এয়া কোনোপধ্যে মানি ল’ব নোৱাৰি, জনালে বিদেশ মন্ত্ৰালয়ৰ মুখপাত্র অনুৰাগ শ্রীবাস্তৱে৷

ভাৰতৰ তৰফৰ পৰা অভিযোগ কৰা হৈছিল ২৯ আগষ্টৰ নিশা পেংগং টাছ’ লেকৰ দক্ষিণ প্ৰান্তত অনুপ্ৰৱেশৰ চেষ্টা কৰিছিল ভাৰতীয় সেনা বাহিনীয়ে। তেওঁলোকক বাধা দিয়ে ভাৰতীয় সেনাবাহিনীয়ে। ইয়াৰ পিছতে জনোৱা হয় যে, আলোচনা অনুযায়ী শান্তি তথা নিৰাপত্তাৰ ক্ষেত্ৰত অধিক সজাগ হওক চীন।

আৰু এবাৰ প্রকৃত নিয়ন্ত্রণ ৰেখাৰ ওচৰত উত্তেজনাময় পৰিস্থিতিৰ সৃষ্টি হোৱাৰ কাৰণে প্ৰতিৰক্ষা মন্ত্ৰী ৰাজনাথ সিঙে বৈঠক কৰে বিদেশ মন্ত্ৰী এছ জয়শংকৰ, ৰাষ্ট্ৰীয় নিৰাপত্তা উপদেষ্টা অজিত ডোভাল, চীফ অৱ ডিফেন্স ষ্টাফ জেনেৰেল বিপিন ৰাৱাট তথা সেনাপ্রধান জেনেৰেল এম এম নাৰাভানৰ সৈতে। চৰকাৰী সূত্ৰৰ খবৰ মতে, ভাৰতে নিজৰ আগ্ৰাসী মনোভাৱ বৰ্তাই ৰাখিয়ে আগবাঢ়িব।

ইয়াৰ মাজতে ভাৰত আৰু চীনৰ ব্রিগেডিয়াৰ পর্যায়ৰ বৈঠক অনুষ্ঠিত হয় চুচুলত৷ এই বৈঠক ফলপ্রসূ হোৱা নাই বুলি জানিব পৰা গৈছে। ভাৰতীয় সেনাই এইবাৰ ষ্ট্ৰেটেজি মানি পেংগং লেকৰ দক্ষিণ দিশত নিজৰ অৱস্থান গ্ৰহণ কৰাৰ কথা জানিব পৰা গৈছে। ইয়াৰ ফলত চীনা সেনাৰ গতিবিধি খুব ভালকৈ নিৰীক্ষণ কৰিব পাৰিব ভাৰতীয় সেনাই।

অন্য কোনো দেশৰ এক ইঞ্চি ভূমিও কোনোদিনে দখল কৰা নাই চীনে। চীনা সেনাই অন্য দেশৰ ভূখণ্ডত অনুপ্রৱেশ কৰাৰো প্ৰশ্ন নুঠে। লাডাখত নতুনকৈ উত্তেজনাময় পৰিস্থিতিৰ মাজতে এনে দাবী কৰিছে বেইজিঙে৷ ইয়াৰ লগতে অৱশ্যে নৰম সুৰ চীনৰ বিদেশ মন্ত্ৰালয়ৰ মুখপাত্ৰৰ। ভুল বুজাবুজিৰ কাৰণেই সীমান্তত নতুনকৈ উত্তেজনা বিয়পি পৰিব পাৰে।