Income Tax : ৭ দিনৰ ভিতৰত কৰক এইকেইটা কাম, অন্যথা বিপদত পৰিব পাৰে?

হাতত আৰু বেছি সময় নাই। আৰ্থিক বৰ্ষ ২০২২–২৩ শেষ হ’বলৈ আৰু মাত্ৰ এসপ্তাহ বাকী। দেশৰ সকলো কৰদাতাই আগন্তুক ৭ দিনৰ ভিতৰত ইনকাম টেক্স সংক্ৰান্তীয় এই ৫টা কাম কৰিব লাগিব। এয়া নকৰিলে আয়কৰ বিভাগৰ ফালৰ পৰা জাননী লাভ কৰাই নহয় মোটা অংকৰ জৰিমনা ভৰিব লাগিব পাৰে। ইয়াৰ ডেডলাইন ৩১ মাৰ্চ ২০২৩।

১ এপ্ৰিলৰ পৰা নতুন বিত্তীয় বৰ্ষ ২০২৩–২৪ আৰম্ভ হ’ব। বিত্তীয় বৰ্ষ শেষ হোৱাৰ পূৰ্বে কেইবাটাও কাম কৰিব লাগিব। নহ’লে সমস্যাত পৰিব লাগিব পৰৱৰ্তী বৰ্ষত। সকলো কামেই অৰ্থ সংক্ৰান্তীয়। সেয়ে কিছু সচেতন হোৱা প্ৰয়োজন। ইয়াৰ মাজতে অগ্ৰিম কৰ জমা দিয়াৰ সময়সীমা পাৰ হৈ গৈছে।

৩১ মাৰ্চ ২০২৩ৰ ভিতৰত কৰিব লাগিব এই কামকেইটা। কি কি কৰিব লাগিব আপুনি?

পান আধাৰ লিংক – আয়কৰ বিভাগৰ ফালৰ পৰা চলিত বছৰৰ মাৰ্চৰ শেষ পৰ্যন্ত সময় দিয়া হৈছে পান–আধাৰ লিংক কৰাৰ বাবে। এয়া বাধ্যতামূলক বিষয়। লিংক নকৰিলে PAN নিষ্ক্ৰিয় হৈ যাব। ফলত আয়কৰ ৰিটাৰ্ণ দাখিল কৰা বা আন কাম কৰাত অসুবিধা হ’ব পাৰে। ৩১ মাৰ্চ ২০২৩ৰ পিছত PAN আৰু আধাৰ লিংক কৰাবলৈ গ’লে ভৰিব লাগিব ১০০০ টকাৰ জৰিমনা।

আইটিআৰ আপডেট – ২০১৯–২০ বিত্তীয় বছৰৰ বাবে আপডেট কৰা আয়কৰ ৰিটাৰ্ণ ফাইল কৰাৰ সময়সীমা হ’ল ৩১ মাৰ্চ ২০২৩। যিসকল কৰদাতাই ২০১৯–২০ বিত্তীয় বৰ্ষৰ বাবে আইটিআৰ ফাইল কৰা নাই বা কোনো আয়ৰ ৰিপ’ৰ্ট মিছ কৰিছে তেওঁলোকে এয়া আপডেট কৰা আইটিআৰ বা আইটিআৰ–ইউ ফাইল কৰিব পাৰে।

২০২২–২৩ বিত্তীয় বৰ্ষৰ বাবে আয়কৰ ৰেহাই পাবলৈ বিনিয়োগৰ সময়সীমা ৩১ মাৰ্চ ২০২৩ত শেষ হ’ব। যিসকলে ২০২২–২৩ বিত্তীয় বৰ্ষৰ বাবে পুৰণি কৰ ব্যৱস্থা বাচি লৈছে তেওঁলোকৰ বাবে এয়া গুৰুত্বপূৰ্ণ। কৰদাতাই পুৰণি কৰ ব্যৱস্থাৰ অধীনত বিনিয়োগৰ বাবে বিভিন্ন ৰেহাই দাবী কৰিব পাৰে।

বীমা পলিচীৰ বাবে ফৰ্ম 12BB জমা কৰিব লাগিব – আপোনাৰ ওচৰত যদি কোনো ইন্সুৰেঞ্চ পলিচী আছে যাৰ প্ৰিমিয়াম ৫ লাখ টকাৰ বেছি, তেন্তে ১ এপ্ৰিলৰ পিছত মেচ্যুৰিটীৰ এমাউণ্টত কোনো টেক্স ৰেহাই নাপাব। সেয়ে ৩১ মাৰ্চৰ পূৰ্বে প্ৰিমিয়াম দিলে টেক্স ৰেহাই পাব। ইয়াৰ পিছত আপুনি নতুন নিয়মত প্ৰিমিয়ামৰ ওপৰত টেক্স দিব লাগিব। আপুনি বেতনভোগী হ’লে ৩১ মাৰ্চৰ পূৰ্বে ফৰ্ম 12BB জমা কৰিব লাগিব। ইয়াৰ ভিতৰত HRA, LTC হোম লোণত সুদ ইত্যাদি দি টেক্স ৰেহাই পাব পাৰে।