সুখবৰ: ৰেকৰ্ড স্তৰৰ পৰা Gold হ’লগৈ ৫৫৪৭ টকা পৰ্যন্ত সস্তা, আগন্তুক সময়ত দাম কমিব নে বাঢ়িব চাওক

নতুন দিল্লীঃ আন্তঃৰাষ্ট্ৰীয় বজাৰৰ দৰে ঘৰুৱা বজাৰতো সোণৰ দাম একেৰাহে হ্ৰাস পাইছে। শুকুৰবাৰে একেৰাহে চতুৰ্থ দিন সোণৰ দাম কম হোৱা দেখা যায়। এমচিএক্সত ডিচেম্বৰত ডেলিভাৰী হ’বলগীয়া সোণ ১০ গ্ৰামত ৫০,৬৫৩ টকা হোৱা দেখা যায়। ৰূপৰ মূল্যৰ ক্ষেত্ৰতো প্ৰতি কিলোগ্ৰাম ৬১,৫১২ হৈছে। বিশেষজ্ঞসকলৰ মতে, ১৭ অক্টোবৰত নৱৰাত্ৰি আৰম্ভ হোৱাৰ লগে লগে উৎসৱৰ বতৰ আৰম্ভ হ’ব আৰু ইয়াৰ লগে লগে সোণৰ চাহিদা বৃদ্ধি পাব। অৱশ্যে দামৰ ক্ষেত্ৰত আন্তঃৰাষ্ট্ৰীয় বজাৰত হ্ৰাস পোৱালৈ চাই ঘৰুৱা বজাৰত দাম বঢ়াৰ সম্ভাৱনা তেনেকৈ নাই।

৫৫৪৭ টকা পৰ্যন্ত সস্তা হৈছে সোণ- আগষ্টত সোণৰ দাম প্ৰতি দহ গ্ৰামত ৫৬,২০০ টকা হৈ অভিলেখ গঢ়িছিল। আনহাতে ৰূপৰ মূল্য প্ৰতি কিলোগ্ৰামত ৮০,০০০টকা চুইছিলগৈ। তেতিয়াৰ পৰা এতিয়ালৈ সোণৰ দাম প্ৰতি দহ গ্ৰামত ৫৫৪৭ টকা হ্ৰাস পাইছে। লগতে ৰূপৰ মূল্যও প্ৰতি কিলোগ্ৰামত ১৮৪৮৮টকা কম হৈছে।

আন্তঃৰাষ্ট্ৰীয় বজাৰত হ্ৰাস পাইছে মূল্য- বিশ্বৰ বজাৰত সোণৰ দাম কম হোৱা দেখা গৈছে। বৰ্তমান সোণৰ ০.১শতাংশ দাম পৰি প্ৰতি আউন্সত ১৯০৬.৩৯ ডলাৰ হৈছে। এই সপ্তাহত সোণৰ দাম ২শতাংশৰো অধিক হ্ৰাস পাইছে। অন্যান্য মূল্যৱান ধাতুৰ ভিতৰত ৰূপৰ মূল্য ০.২% হ্ৰাস পাই প্ৰতি আউন্সত ২৪.২৬ডলাৰ হৈছে। আনহাতে প্লেটিনামৰ দাম ০.২শতাংশ বাঢ়ি প্ৰতি আউন্সত ৮৬৬.০৫ডলাৰ হৈছে।

দীপাৱলী লৈকে সোণৰ দাম আৰু হ্ৰাস পাব পাৰে-৭ আগষ্ট, ২০২০ত সোণ–ৰূপৰ বজাৰত সৰ্বকালৰ অভিলেখ ভংগ হৈ প্ৰতি দহ গ্ৰামত ৫৬২০০টকা হৈছিল। আগন্তুক সময়ত ডলাৰ মজবুত হোৱালৈ চাই সোণৰ দাম আৰু হ্ৰাস পোৱাৰ সম্ভাৱনা আছে।

বিশেষজ্ঞসকলৰ মতে সোণ সুৰক্ষিত বিনিয়োগ হোৱাৰ কাৰণে চাহিদা বৃদ্ধিৰ সম্ভাৱনা আছে। আমেৰিকাৰ নিৰ্বাচন হোৱাৰ কাৰণে ডলাৰৰ ক্ষেত্ৰত মজবুতি দেখিবলৈ পোৱা যাব আৰু ইয়াৰ প্ৰভাৱ সোণৰ মূল্যত পৰিব। সোণৰ দাম বহুকেইটা কাৰকৰ ওপৰত নিৰ্ভৰশীল।

সোণৰ মূল্য আগন্তুক সময়ত কিমান কমে সেয়া লক্ষ্যণীয় হ’ব।