‘ভৱিষ্যতৰ দল গঠনৰ বাবে বিচাৰি আনিছিলো এই টুকুৰা হীৰা’-ধোনীৰ অৱসৰ ঘোষণাৰ পিছতে ‘দাদা’ই কৰিলে বিশেষ মন্তব্য

ভাৰতীয় ক্ৰিকেটদলত ধোনীক স্থান দিছিল সৌৰভ গাংগুলীয়ে। ধোনীৰ অৱসৰৰ সিদ্ধান্তক সন্মান জনাই গাংগুলীয়ে কৈছে যে, ‘ ধোনীৰ নেতৃত্ব প্ৰদানৰ অসাধাৰণ ক্ষমতা দলত আকৌ পুনৰাবৃত্তি হোৱাটো কঠিন।’ সৌৰভ গাংগুলী অধিনায়ক হৈ থকাৰ সময়তে ২০০৪ চনত মহেন্দ্ৰ সিং ধোনীৰ অভিষেক ঘটিছিল জাতীয় দলত।

ধোনীয়ে অৱসৰ ঘোষণা কৰাৰ পিছত সৌৰভ গাংগুলীয়ে কৈছে যে, ‘এটা যুগৰ অৱসান ঘটিছে। বিশ্ব ক্ৰিকেট বা ভাৰতীয় ক্ৰিকেটে সহজে ধোনীৰ সমকক্ষ খেলুৱৈ পুনৰ লাভ কৰাটো অত্যন্ত কঠিন হ’ব। বিশেষকৈ লিমিটেড অ’ভাৰ ফৰ্মেটত।

২০০৭ চনত ধোনীয়ে লাভ কৰে দলৰ অধিনায়কৰ দায়িত্ব। ধোনীৰ প্ৰথম ছিৰিজ আছিল পাকিস্তানৰ বিৰুদ্ধে। ভাৰতক ২০০ খন মেচত নেতৃত্ব দিছিল ধোনীয়ে।

যেতিয়া সৌৰভ গাংগুলীৰ নেতৃত্বত ধোনীয়ে কেৰিয়াৰ আৰম্ভ কৰিছিল, তেতিয়া প্ৰথম কেইখনমান মেচত একেবাৰে নিৰাশজনক প্ৰদৰ্শন কৰিছিল ধোনীয়ে। কিন্তু তথাপিও ধোনীৰ ওপৰত বিশ্বাস হেৰুৱাই পেলোৱা নাছিল গাংগুলীয়ে। আৰু গাংগুলীৰ সন্মান ৰাখি ধোনীয়ে পাকিস্তানৰ বিৰুদ্ধে সেই ছিৰিজতে ১৪৮ ৰানৰ বিস্ফোৰক ইনিংছ খেলে।

পিছত শ্ৰীলংকাৰ বিৰুদ্ধে ১৮৩ ৰানৰ দুৰ্দান্ত ইনিংছ খেলি একেৰাতিতে তাৰকাৰ শাৰীলৈ অগ্ৰসৰ হয় ধোনী। ধোনীৰ ১৫ বছৰীয়া কেৰিয়াৰক এতিয়া ‘আউটষ্টেণ্ডিং’ বুলি কৈছে গাংগুলীয়য়ে। অৱসৰৰ পিছত ধোনীৰ জীৱনৰ দ্বিতীয় ইনিংছৰ বাবেও শুভেচ্ছা জনালে সৌৰভ গাংগুলীয়ে।