Neeraj Chopra Prize Money: কোটি কোটি টকা পুৰস্কাৰৰ নীৰজ চোপ্ৰাই দিব লাগিব ৩০% কৰ ! কিমান আৰ্থিক পুৰস্কাৰ পালে নীৰজ চোপ্ৰাই

এশ বছৰৰো অধিক সময় ধৰি অলিম্পিকত কোনো ট্ৰেক এণ্ড ফিল্ড ইভেণ্টত কোনো এজন ভাৰতীয় এথলীটে সোণৰ পদক পোৱা নাছিল। সেই অপেক্ষাৰ অন্ত পেলাই টকি'অ অ'লিম্পিকত সোণৰ পদক আজুৰি আনিলে নীৰজ চোপ্ৰাই।

সোণৰ পদক জয়ৰ পাছৰ পৰা নীৰজৰ ওপৰত 'পুৰস্কাৰৰ বৰষুণ' হোৱাৰ দৰে হৈছে। আৰ্থিক পুৰস্কাৰৰ উপৰি গাড়ী আৰু এক বছৰৰ বাবে বিনামূলীয়াকৈ ফ্লাইটৰ যাত্ৰাৰ সূযোগ পাইছে তেওঁ। কিন্তু আৰ্থিক পুৰস্কাৰৰ বহুখিনি নীৰজে ওভতাই দিব লাগিব কৰ (Tax) হিচাপে।

আয় কৰ আইনৰ ১০(১৭A) ছেকছন অনুসৰি ৰাজ্যিক বা কেন্দ্ৰীয় চৰকাৰে কোনো ক্ৰীড়াবীদক আৰ্থিক পুৰস্কাৰ দিলে সেয়া সম্পূৰ্ণ টেক্স ফ্ৰী হয়। কিন্তু অন্য কোনোবাই বিত্তীয় পুৰস্কাৰ দিলে সেই ক্ষেত্ৰত খেলুৱৈজনে কৰ দিবলগীয়া হয়।

আনন্দ মাহিন্দ্ৰা (Anand Mahindra)ই নীৰজক এখন গাড়ী উপহাৰ দিছে। ইয়াৰ বাবে নীৰজে ৩০ শতাংশ কৰ দিব লাগিব চৰকাৰক। এনে ক্ষেত্ৰত চৰকাৰৰ বাদে আন কোনোবা ব্যক্তি আথবা প্ৰতিষ্ঠানৰ পোৱা সকলো পুৰস্কাৰবোৰৰ কাৰণে নীৰজে কৰ ভৰিব লাগিব।

হাৰিয়ানা চৰকাৰৰ পৰা নীৰজে পাব ৬ কোটি টকা, পঞ্জাৱ চৰকাৰৰ পৰা ২ কোটি আৰু মণিপুৰ চৰকাৰৰ পৰা ১ কোটি টকা আৰু ৰে'ল বিভাগৰ পৰা ৩ কোটি টকা পুৰস্কাৰ পাব নীৰজে। আকৌ চেন্নাই চুপাৰ কিংছ (CSK)ৰ ফালৰ পৰা ১ কোটি, BCCIয়েও ঘোষণা কৰিছে ১ কোটি টকা আৰু ভাৰতীয় অ'লিম্পিক সংস্থাই দিবলৈ ওলাইছে ৭৫ লাখ টকা।