International Yoga Day 2022: এই সহজ ৬টা যোগাসনেৰে নিমিষতে দূৰ হ’ব পেটৰ চৰ্বি

আধুনিক লাইফষ্টাইলৰ এটা অন্যতম ডাঙৰ সমস্যা হ’ল পেটৰ বা কঁকালৰ চৰ্বি। দীৰ্ঘদিন ধৰি বহি বহি কাম কৰা ফলত, অথবা খোৱা–টোপনিৰ অনিয়ম, ন্যূনতম শাৰীৰিক কচৰৎ আদি নানা কাৰণত পেটৰ মেদ বৃদ্ধি পায়। আজি আন্তৰ্জাতিক যোগ দিৱসত জানি লওক ৬টা সহজ ব্যায়ামৰ বিষয়ে। যি নিয়মিত কৰিব পাৰিলে দূৰ হ’ব পেটৰ চৰ্বি।

ভূজংগাসন : উবুৰি হৈ শুই হাতৰ সহায়ত যিমান সম্ভৱ দেহৰ ওপৰভাগ পিছলৈ ষ্ট্ৰেচ কৰিব লাগিব। কিন্তু নাভি আৰু ভৰিৰ পতা মাটিৰ পৰা উঠিলে নহ’ব। চেষ্টা কৰক ২৫–৩০ ছেকেণ্ড এই পজিচনত থাকিবলৈ। এই আসনে পেটৰ চৰ্বিত চাপ সৃষ্টি কৰে। মেৰুদণ্ড সবল কৰে।

ধনুৰাসন : উবুৰি হৈ শুই হাতেৰে ভৰিৰ পতা ধৰিব লাগিব। ইয়াৰ পিছত দেহটো ধনুৰ দৰে ভাঁজ কৰি মূৰ, ভৰি, হাত ওপৰৰ ফালে টানি তুলিব লাগিব। কেৱল পেটৰ সংযোগ থাকিব মাটিৰ সৈতে। পেটৰ চৰ্বি কমোৱাত এই আসন অতি ফলপ্ৰসূ।

কুম্ভাকাসন – উবুৰি হৈ শুই হাতৰ সহায়ত সমগ্ৰ দেহ ওপৰলৈ তুলিব লাগিব। হাত আৰু ভৰি পোন কৰিব লািব। ভৰিৰ পতাৰ ওপৰত দেহৰ ভৰ বেলেঞ্চ কৰিব লাগিব। পেটৰ চৰ্বি কমোৱাৰ লগতে পেশী মজবুত কৰে এই আসনে।

নৌকাসন : বহি সৈ হাতৰ সহায় অবিহনে যিমান সম্ভৱ ওপৰলৈ ভৰি তোলক। হাত দুখনো সমানে আগুৱাই নিব লাগিব। শৰীৰৰ আকৃতি হ’ব নৌকাৰ দৰে। এই আসন কৰিলে কঁকালৰ চৰ্বিত চাপ পৰে, বেলি ফেট কমিব।

উষ্ট্ৰাসন : এই আসনত আঁঠুৰ ওপৰত ভৰ দি বহি শৰীৰৰ ওপৰৰ অংশ পিছফালে হাউলি, হাতেৰে ভৰিৰ গোৰোহা স্পৰ্শ কৰিব লাগিব।৩০ ছেকেণ্ড পৰ্যন্ত এনে কৰিব পাৰিলে ভাল। এই আসনত পিঠিৰ বিষ নোহোৱা হয় বহু পৰিমাণে।

পশ্চিমত্তাসন : ভৰি দুখন আগলৈ মেলি বহক। এইবাৰ হাত দুখনেৰে ভৰিৰ আঙুলি চুব লাগিব। নাক যাতে আঁঠুত থাকে। এই আসনত পেটৰ চৰ্বি কমে।