দীৰ্ঘসময় ধৰি খালী পেটে থকা, পেট্ৰ’ল–ডিজেলৰ গোন্ধ বা পাহাৰীয়া অকোৱা–পকোৱা পথেৰে যাত্ৰা কৰিলে বমি ভাৱ হয় বহু লোকৰ। ইয়াৰ উপৰি অন্তঃসত্ত্বা অৱস্থাসহ বিভিন্ন অৱস্থাত বমি বমি ভাৱ হয় বহুতৰে। বহুতে ঔষধ খায় যদিও কামত নাহে। ঔষধৰ সলনি ব্যৱহাৰ কৰিব পাৰে কিছুমান ঘৰুৱা উপায়। শুকান ইলাচী আৰু মৌৰ সৈতে মিহলাই খাব পাৰে। মৌ আৰু ইলাচীৰ সোৱাদ আৰু গোন্ধই বমি ভাৱ দূৰ কৰে। হাতত দুখিলামান পদিনা পাত ৰাখক। পদিনা পাত চোবাই খালেও বমি ভাৱ দূৰ হ’ব পাৰে। সামান্য পানীত আদা কাটি মিহলাই মুখত ৰাখক। বমি ভাৱ দূৰ হ’ব। বহু সময়ত বদহজমৰ পৰাও বমি হয়। সেইক্ষেত্ৰত এক কাপ নাৰিকলৰ পানীত এচামুচ নেমুৰ ৰস মিহলাওক। ১৫ মিনিট পিছত সেই মিশ্ৰনৰ পৰা অলপ পান কৰক। বমি ভাৱ দূৰ হোৱাৰ লগতে বদহজমৰ সমস্যাও কমিব। বমি ভাৱ দূৰ কৰিবলৈ লঙৰ ব্যৱহাৰ অতি প্ৰাচীণ। মুখত এটা লং ৰাখিলে বমি ভাৱ দূৰ হ’ব পাৰে। খোৱাৰ পিছত মুখৰ গোন্ধ দূৰ কৰিবলৈ গোৱামুৰি ব্যৱহাৰ কৰা হয়। বমি ভাৱ হ’লেও গোৱামুৰিয়ে সকাহ দিয়ে।
