আকৌ ৫০,০০০ টকা পাৰ হ’ল সোণৰ দাম

সোমবাৰে ভাৰতীয় বজাৰত আকৌ দাম বাঢ়িল সোণৰ। দিল্লীৰ সোণ–ৰূপৰ বজাৰত ২১ ডিচেম্বৰ, ২০২০ত সোণৰ দাম প্ৰতি দহ গ্ৰামত ৪৯৬টকা বাঢ়ি ৫০,০০০টকা পাৰ হ’ল৷ অন্যহাতে ৰূপৰ দাম বাঢ়িছে ২২৪৯টকা। আন্তঃৰাষ্ট্ৰীয় বজাৰত কোৰোণা ভাইৰাছক লৈ আকৌ শংকাৰ কাৰণে উৰ্ধমুখী হৈছে সোণ তথা ৰূপৰ মূল্য।

২১ ডিচেম্বৰত দিল্লীৰ সোণ–ৰূপৰ বজাৰত ৯৯শতাংশ শুদ্ধতাৰ সোণৰ দাম বাঢ়ি প্ৰতি দহ গ্ৰামত ৫০,২৯৭টকা হৈছে। আন্তঃৰাষ্ট্ৰীয় বজাৰত সোণৰ দাম বাঢ়ি ১৮৯৮ ডলাৰ প্ৰতি আউন্সত হৈছে। ইয়াৰ লগতে সোমবাৰে টকাৰ মূল্য ১৭ পইচা হ্ৰাস পাই ৭৩.৭৩ হৈছে।

সোণৰ সমানে সমানে ৰূপৰ দামো বাঢ়িছে সোমবাৰে। প্ৰতি কিলো ৰূপৰ দাম ২২৪৯টকা বাঢ়ি ৬৯৪৭৭টকা হৈছে। আন্তঃৰাষ্ট্ৰীয় বজাৰত ৰূপৰ দাম বাঢ়ি হৈছে ২৬.৬৩ডলাৰ প্ৰতি আউন্স।

বিশেষজ্ঞসকলে জনায়, আন্তঃৰাষ্ট্ৰীয় বজাৰত সোণ তথা ৰূপৰ দাম বৃদ্ধিৰ প্ৰভাৱ পৰিছে দেশৰ বজাৰতো। কোৰোণা ভাইৰাছৰ নতুন ষ্ট্ৰেইনৰ কাৰণে বিনিয়োগকাৰীসকলে আকৌ সোণত বিনিয়োগ কৰা আৰম্ভ কৰিছে ফলত দুইবিধ ধাতুৰ মূল্য বাঢ়িছে। কোৰোণাৰ নতুন ষ্ট্ৰেইনৰ কাৰণে ব্ৰিটেইনত আকৌ কঠোৰ লকডাউন জাৰি কৰা হৈছে। ইউৰোপ তথা অন্যান্য দেশতো যথেষ্ট নিষেধাজ্ঞা জাৰি কৰা হৈছে। ইয়াৰে প্ৰভাৱ পৰা আৰম্ভ হৈছে গ্ল’বেল ইক’নমিত।