চাৰিওফালে ডেংগিৰ আতংক, মহে কাক বেছিকৈ কামোৰে জানেনে? সতৰ্ক হওক

ৰাজ্যত প্ৰতিদিনে বৃদ্ধি পাইছে ডেংগিত আক্ৰান্ত লোকৰ সংখ্যা। মৃত্যুৰ সংখ্যাও বাঢ়িছে। বিশেষজ্ঞসকলে কয়, দিনৰ ভাগতে ডেংগিৰ মহে কামোৰে। মহৰ কামোৰৰ ফলত ডেংগিৰ সৈতে মেলেৰিয়া, চকুণগুনীয়াৰ দৰে ৰোগো হ’ব পাৰে। এনেধৰণৰ ভয়ংকৰ ৰোগৰ পৰা ৰক্ষা পাবলৈ মহৰ কামোৰৰ পৰা নিজৰে ৰক্ষা কৰিব লাগিব। অৱশ্যে মহৰ কামোৰ নোখোৱা মানুহ হয়তো নোলাব।

কিন্তু লক্ষ্য কৰিলে দেখা যাব, মহে কিছুমান মানুহক তুলনামূলকভাৱে বেছিকৈ কামোৰে। ভিৰৰ মাজত বহি আছে বহুতে। কিন্তু দেখা যায়, তাৰ মাজত দুই–এজনকহে আগুৰি ধৰে মহে। কিয় এনে হয় জানেনে? জানি লৈ সতৰ্ক হওক।

গৱেষণাত জনা গৈছে, নিৰ্দিষ্ট কিছুমান গ্ৰুপৰ তেজ বিশেষকৈ পছন্দ কৰে মহে। এডিছ মহৰ পছন্দ O ব্লাড গ্ৰুপৰ তেজ। কিন্তু এনোফেলিছ মহৰ পছন্দ AB গ্ৰুপৰ তেজ।

মহে বহু দূৰৰ পৰাই কাৰ্বন ডাই অক্সাইডৰ সন্ধান পায়। চেহেৰাত যিসকল দেখিবলৈ ডাঙৰ তেওঁলোকৰ শৰীৰৰ পৰা স্বাভাৱিকতে অধিক কাৰ্বন ডাই অক্সাইড বেছিকৈ নিৰ্গত হয়। সেয়ে এওঁলোকক মহে বেছিকৈ কামোৰে। মুখ আৰু নাকৰ পৰা কাৰ্বন ডাই অক্সাইড বাহিৰ হয় বাবেই মূৰৰ ওপৰত মহে আগুৰি ধৰা দেখা যায়।

মহে নানা ধৰণৰ গোন্ধ পায়। ঘামপ পৰা নিৰ্গত এম’নিয়া, লেকটিক এচিডৰ গোন্ধ পায় মহে। অতিৰিক্ত পৰিশ্ৰমৰ ফলত যিদৰে শৰীৰ গৰম হয় আৰু লেকটিক এচিড তৈয়াৰ হয়। ঘামৰ গোন্ধৰ ওপৰতো নিৰ্ভৰ কৰে কাক মহে বেছি কামোৰে। যিসকলে বেছি ঘামে তেওঁলোকৰ বহু দূৰৰ পৰা সন্ধান পায় মহে।

গৰ্ভৱতী মহিলাসকলকো মহে বেছিকৈ কামোৰে। ২০০০ চনত আফ্ৰিকাত হোৱা এক গৱেষণাই কয়, গৰ্ভৱতী মহিলাসকলক দুগুণ বেছি কামোৰে মহে। কাৰণ তেওঁলোকৰ শৰীৰ তুলনামূলকভাৱে বেছি গৰম থাকে।

গৱেষণাত দেখা গৈছে যে যিসকলে পানী খাই তেওঁলোকতকৈ বিয়েৰ খোৱা লোকসকলৰ প্ৰতি মহ বেছিকৈ আকৰ্ষিত হয়।

এজন লোকৰ ছালত কি পৰিমাণৰ বেক্টেৰিয়া আছে তাৰ ওপৰতো নিৰ্ভৰ কৰে মহে কামোৰাতো। য’ত বেক্টেৰিয়া বেছি তাৰ প্ৰতি মহ অধিক আকৰ্ষিত হয়। সেইবাবে ভৰি আৰু গোৰোহাত মহে অধিক কামোৰে। পোছাকৰ ওপৰতো বহু পৰিমাণে এয়া নিৰ্ভৰ কৰে। ক’লা বা অন্যান্য গাঢ় ৰঙৰ পোছাক যিসকলে পিন্ধে তেওঁলোকক মহে আগুৰি ধৰে। (Disclaimer : এই প্ৰতিবেদন কেৱল মাত্ৰ সাধাৰণ তথ্যৰ ওপৰত আধাৰিত, বিস্তাৰিতভাৱে জানিবলৈ বিশেষজ্ঞৰ পৰামৰ্শ লওক।)