Radhika Merchant: দেওবাৰে মঞ্চত ৰাধিকা, নীতা আৰু মুকেশ আম্বানী আয়োজিত ‘আৰঙ্গেত্ৰম’ত ছলমান–আমিৰো

প্ৰথমবাৰ মঞ্চত ৰাধিকা মাৰ্চেণ্ট। ব্যৱসায়ী বীৰেন মাৰ্চেণ্ট আৰু শৈলা মাৰ্চেণ্টৰ ডাঙৰ কন্যা ৰাধিকা ভাৰতনাট্যম নৃত্য প্ৰতিভা প্ৰথমবাৰ দৰ্শকৰ সন্মুখত তুলি ধৰে। অনুষ্ঠান আয়োজনৰ মূল কৰ্ণধাৰ মাৰ্চেণ্ট পৰিয়াল আৰু আম্বানী পৰিয়াল। ৰিলায়েঞ্চ ইণ্ডাষ্ট্ৰীজ লিমিটেডৰ অধ্যক্ষ আৰু মেনেজিং ডিৰেক্টৰ মুকেশ আম্বানী আৰু পত্নী নীতা আম্বানীৰ সৰু পুত্ৰ অনন্ত আম্বানীৰ বাগদত্তা ৰাধিকা।

গুৰু ভাৱনা ঠাকাৰৰ ওচৰত নৃত্য প্ৰশিক্ষণ লৈছে ৰাধিকাই। ভাৱনা ঠাকাৰৰ শ্ৰীনিবাস আৰ্টছৰ ছাত্ৰী তেওঁ। বহু বছৰ ধৰি নৃত্য শিকাৰ পিছত প্ৰথমবাৰ নিজৰ অনুষ্ঠানত নৃত্য কৰে এই প্ৰতিষ্ঠানৰ ছাত্ৰ–ছাত্ৰীসকলে। তাকে কোৱা হৈছে ‘আৰঙ্গেত্ৰম’। ২৭ বছৰীয়া ৰাধিকাৰ ‘আৰঙ্গেত্ৰম’ অনুষ্ঠিত হয় মুম্বাইৰ জিঅ’ ৱৰ্ল্ড চেণ্টাৰৰ ‘দ্য গ্ৰেণ্ড থিয়েটাৰ’ত। দেওবাৰে, ৫ জুনত সন্ধিয়া ৬ বজাত।

ৰাধিকাৰ ভাৰত নাট্যম নৃত্য চাবলৈ বলীউদৰ নামী তাৰকাসকল উপস্থিত থাকে। ছলমান খান, আমিৰ খানৰ দৰে শিল্পীৰ সমাৱেশত উজ্জ্বল হৈ উঠে ‘আৰঙ্গেত্ৰম’। মহাৰাষ্ট্ৰৰ মুখ্যমন্ত্ৰী উদ্ধৱ থাকৰেও উপস্থিত থাকে অনুষ্ঠানত। থাকে মাৰ্চেণ্ট আৰু আম্বানী পৰিয়ালৰ সদস্যসকলো।

কিছুদিন পূৰ্বে ৰাধিকাক ফেশ্বন ডিজাইনাৰ মনীষ মালহোত্ৰাৰ দোকানৰ পৰা ওলোৱা দেখিছিল সাংবাদিকে। তেতিয়াই ধাৰণা কৰা হয়, ৰাধিকাই সম্ভৱত মনীষৰ ডিজাইন কৰা পোছাক পিন্ধি ভাৰতনাট্যম নাচিব।

১৯৯৪ চনত জন্ম ৰাধিকাৰ। মুম্বাইৰ কেথিড্ৰেল এণ্ড জন কনন স্কুলছত পঢ়াশুনা কৰিছে। বিডি ছোমানি ইণ্টাৰনেচনেল স্কুলতো পঢ়িছে ৰাধিকাই। তাৰ পিছত নিউয়ৰ্ক বিশ্ববিদ্যালয়ৰ পৰা অৰ্থনীতি আৰু ৰাজনীতি বিষয় লৈ স্নাতক পাছ কৰিছে। দেশলৈ উভতি এক বৃহৎ প্ৰতিষ্ঠানত কামো কৰিছে।